Rikoto el sojlakto.

Saluton! Ciao! Antaŭ du jaroj mi vizitis Sicilion. Tie mi malkovris rikoton (verdire mi manĝis ĝin en fruaj jaroj, sed mi nebule memoras) kie preskaŭ estas ‘nacia’ fromaĝo. Ĝin oni uzas speciale por dolĉaĵo nomata ‘kanoloj’ pri kiu mi prilaboras veganan recepton! Tamen, rikoton eblas manĝi kun pano, kun salato, kun sukero, laŭ via plaĉo! Mi mem ne tro ŝatas fromaĝojn sed ĉi tiun mi tre ŝatis ĉar ĝi ne gustas al la tradiciaj. Krome, la ingrediencoj kaj sekvendaj paŝoj etas tre simplaj, sed sukeraj aldonoj, kemiaĵoj aŭ aliaj tiaj aferoj kiuj malplianigas niajn manĝaĵojn! Ĝuu rikoton!

Ingrediencoj:

  • 1 litro da sojlakto sen aldonaj sukeroj.
  • 30 ml da freŝa cintronsuko aŭ pomvinagro.
  • 1 kulereto da salo.

Paŝoj:

  • En bovlo ni boligos la lakton, tuj antaŭ ekbolo, ni forigas el la kuirforno kaj iom post iom aldonas la acidaĵon (citronsuko aŭ pomvinagro), samtempe kirlante per  kulero.
  • Lasu ĝin ripozi 30 minutojn. Post tiu tempo, salu laŭplaĉe kaj ree kirlu ĝin.
  • Filtru ĝin pero fajna filtrilo kaj se eble per helpo de tuko tra kiu filtriĝos la selakto kaj poste metu ĝin en fromaĝ-muldilon se vi havus. Vi povas uzi alitipan etan muldilon por ke ĝi havu ian formon.
  • Lasu ĝin ripozi friduje kelkajn horojn enmuldile. Post tiu tempo forverŝu la selakton kaj ĝi jam pretas por manĝado.

Senalkohola refreŝiga moĥito.

Saluton verduloj! La printempo jam alproksimiĝas freneze varme! En Madrido la temperaturoj nunaj atingas 21 gradojn en, teorie, vintra sezono ankoraŭ! Mi kutime ĉiuvespere eliras piedmarŝi kelkajn kilometrojn kaj la korpo petas al mi ion refreŝigan. Tamen, la kutimaj industriaj refreŝigaĵoj estas plenaj de sukero kaj kemiaĵoj kiujn mi volas ĉiel eviti. Kial do, ne fari moĥiton kun, kiel eble plej naturajn ingrediencojn? Mi ne trinkas alkoholon, mi estas ‘radikala’ abstemiulo kaj neniam trinkis moĥiton, kio estas verŝajne unu el la plej konataj trinkaĵoj de Kubo, mia naskiĝlando. Tial do, bona kialo fari ĝin!

Ingrediencoj (por unu persono):

Paŝoj:

  • Unue tranĉu duone la limeon kaj el ĝi tranĉu rondpecon. Poste la ceteron dispecigu en ne tro etajn pecojn. Aldonu ĝin en glaso vitra, travidebla, kun la ment-folioj. Lasu kelkajn (prefere en branĉeto) por fina ornamo.
  • La glacion diserigu. Mi mem metas ĝin en plastan sakon kaj frakasas ĝin kontraŭ la plankon kaj se daŭre ĝi grandas, mi fine batas per io peza. (sovaĝa maniero, jes, mi konscias 🙂 Sed ne lasu ĝin tro fajna)
  • Nun aldonu la glacion al la glaso, ke ĝi kovru ĝin. Sekve la gasakvon kaj la Agav-siropon. Per kulero aŭ simila ilo delikate kirlu de malsupre supren por ke la likvaĵoj miksiĝu.
  • Ornamu per mentbranĉeto surpinte kaj la limea rondpeceto kiel rado ĉe la rando. Kaj ek al trinkado!
    Jen trinkaĵo refreŝiga, senalkohola kaj kun malmultaj kalorioj. Tiel do, vi rajtas trinki ĉiom kiom vi volos!

*Se vi ne trovas stevion aŭ agavsiropon, ankaŭ povus esti kun bruna sukero, nerafinita se eble.

Farĉitaj melongenoj laŭ armena maniero

Saluton! Բարև
Melongenoj estas tre ŝatataj kaj tre aprezataj en la mediteranea kaj kaŭkaza kuirartoj. Ni povas trovi ilin farĉitaj, rostitaj, frititaj, kremigitaj… Sed, el ili ĉiuj mia plej ŝatata estas la farĉita melongeno. Oni povas trovi tiajn farĉaĵojn ne nur en Armenio sed ankaŭ en ĝiaj ĉirkaŭaj landoj. La recepto ne estas komplika kaj konsistas el simplaj ingrediencoj kaj mi certas ke vi ofte faros ĝin post la unua provo! Kiam mi manĝas ĝin, mi mense kaj guste translokiĝas al Armenio kaj mi amas tion 🙂

Ingrediencoj:
7-8 melongenoj ne tro dikaj, prefere longetaj kaj rektaj por pli facila fritado.

Por la farĉaĵo:

  • 1 meza cepo, fajne tranĉita
  • 1 meza kukurbeto, tranĉita en malgrandajn kubojn
  • 1-2 freŝaj verdaj kapsikoj tranĉitaj en malgrandajn kubojn
  • 4-5 supkuleroj da olivoleo
  • ½ taso da tomatsaŭco, freŝa aŭ endosigita
  • 1 kuleroj da ruĝa kapsika pasto
  • 2-3 kuleroj da tomatsaŭco (nedeviga)
  • 4-5 ajleroj, tranĉitaj
  • Freŝa cilantro, fajne tranĉita por aldono al la melongenoj kaj posta ornamo surtelera.
  • Salo kaj pipro laŭplaĉe
  • ½ kulereto da kareo pulvorigita
  • ½ kulereto da kurkumo
  • 1 kulereto da kajena pipro (sed ne uzu se vi ne ŝatas ĝin)

Ni ankaŭ uzos duontason da tomatsaŭco miksita kun duontaso da akvo.

Lavu kaj parte senŝeligu la melongenojn lasante ĝin kun strio senŝela kaj alia strio kun la ŝelo.

Metu la melongenojn en salan akvon, kovru ilin per telero por ke ĉiuj melongenoj estu tute kovritaj.

Farĉaĵo:

  • Fritu la tranĉitan cepon kun olivoleo ĝis ĝi estu travidebla. Aldonu la tranĉitan kukurbeton, la kapsikojn kaj plu kuiru ĝis ĉio estu mola.
    Miksu la pistitan tomaton kun la kapsika pasto kaj la tomatsaŭco kaj aldonu al la legomoj surfajraj.
  • Plu kuiradu ĝin dum ĉirkaŭ 10 minutoj kaj aldonu ĉiujn spicojn. Elfajrigu kaj lasu ĝin malvarmiĝi.
  • Sekigu la melongenojn, ŝmiru ilin per abunda olivoleo kaj sur pato fritu ilin je mez-malalta fajro kaj lasu malvarmiĝi.
  • Antaŭvarmigu la bakfornon je 200 gradoj, metu la melongenojn sur bakpleton. Fendu ilin  laŭlonge kaj malfermu ĝin kreante ujon.
  • En tiu ‘ujo’ kreita ni aldonos tiom da farĉaĵo kiom ni povos. Verŝu la miksaĵon el diversaj saŭcoj kaj akvo inter la melongenoj kovrante la bakpleton.
  • Kovru ĝin per aluminifolio kaj baku dum 25-35 minutoj.
  • Forigu la aluminifolion kaj plu kuiru ĝin 20-25 minutojn.
  • Ornamu per freŝa koriandro.

Servu la melongenojn kaj ĝuu!

Bonan apetiton!

Բարի ախորժակ

 

Gumbo, el la sud-Usona kuirarto.

Saluton verduloj! Jam ekde pasinta jaro mi volis fari ĉi pladon sed mi iom atendadis. Principe temas pri iom komplika manĝaĵo ĉar la guŝojn oni devus enakvigi kaj kuiri, kaj ili estas sufiĉe malmolaj! Tial mi decidis aĉeti kuiritajn por simpligi la paŝojn. Mi diros ke mi amegas preskaŭ ĉiajn guŝojn kaj mi povus manĝi ilin tage kaj nokte senlace kaj senhalte. Post mia malkovro de la sudusona ‘nigrula’ kuirarto, mi nur bedaŭras ke tiaj pladoj ne vaste famiĝis favore al rapidmanĝaĵoj kaj ni primokas ilin pro manko de bona kuirarto, kio ne tute veras! Tie estas multaj tradiciaj manĝaĵoj kaj ni povas fari tute veganajn versiojn. Mi faris manĝaĵon el Luiziano kaj usona Meksika golfo kiu nomiĝas Gumbo . Temas pri tre ampleksa manĝaĵo ĝi varias de unu loko al alia, ne rigida aŭ strikta rilate al ĝiaj ingrediencoj uzendaj. Plejparte oni preparas ĝin dum la malvarmaj monatoj. Ni diru ke temas pri densa supo kun fiŝaĵoj, viandoj, marfruktoj aŭ nur vegetaĵoj. Ĉi lastan ni faros.

Por tiu ĉi recepto ni uzos tri malsamajn guŝojn: nigrajn fazeolojn, blankajn fazeolojn kaj kikerojn. Kiel mi diris antaŭe por ne komplikigi min, mi aĉetis dosojn kun jam kuiritaj guŝoj. Ankaŭ ni devos fari rostitan saŭcon (france roux), kio estas vere simpla. Kaj alia grava ingredienco estas la gomboj, kiun oni pli konas en Afriko kaj en kelkaj landoj amerikaj. Tamen, se vi ne trovus ĝin facile, uzu terpomojn anstataŭe.

Ingrediencoj:

  • 60 ml da olivoleo
  • 30 gramoj da faruno
  • 1 mezgranda cepo, tranĉita
  • 1 verda kapsiko, kvadrate tranĉita
  • 1 celeri-tigo, tranĉita
  • 3 ajleroj, tranĉitaj
  • 200 gramoj da gomboj, tranĉitaj
  • 400 gramoj da tomatsaŭco
  • 600 ml da vegetaĵa likvaĵo
  • 8 ĉampinjonoj, tranĉitaj kvarone
  • ½ kulereto da seka timiano
  • ½ kulereto da ĉilia pulvoro (aŭ Kajena pipro)
  • 2 laŭro-folioj
  • 330 gramoj da miksitaj guŝoj
  • Salo laŭplaĉe
  • Pipro laŭplaĉe
  • Rizo por manĝi kun la gumbo
  • Petroselo freŝa (opcie)

Paŝoj:

  • Unue varmigu grandan poton mezfajre. Aldonu la oleon kaj sekve la farunon. Konstante kirlu per spatelo dum 10-15 minutoj ĝis la faruno rostiĝu kaj akiru brunan koloron.
  • Aldonu la cepon al la rostsaŭco kaj kirlu malrapide dum kelkaj minutoj. Poste aldonu la kapsikon, celeri-tigon, ajlerojn kaj gombon. Lasu ĝin friti kaj fojfoje kirlu, dum 10 aŭ 15 minutoj ĝis la legomoj estu molaj.
  • Aldonu la tomatsaŭcon, 600 ml da vegetaĵa likvaĵo (en multaj landoj eblas aĉeti en supermarktoj), ĉampinjonojn, timianon, laŭron kaj kajenan pipron. Lasu ĝin boli je meza fajro dum dudek minutoj.
  • Aldonu la guŝojn kaj plu lasu ĝin kuiri 10 minutojn pli. Servu kun rizo kaj laŭplaĉe ornamu per petroselo.

 Bonan apetiton!

Grekaj dolmoj el rizo kaj folibeto

Saluton verduloj!  Γεια σας!
Antaŭ kelkaj semajnoj mi iris al mia kutima supermarkto kaj ĵetis rigardon al la legom-sekcio. Mi rimarkis ke ĝi havas bonkvalitajn kaj grandajn folibetojn kaj tuj pensis pri la grekaj dolmoj kiujn oni nomas greke ”dolmades”. Mi unuafoje konatiĝis kun tia manĝaĵo en Armenio, kie tre popularas la ”tolmoj” el binverfolioj kaj brasikfolioj. Tamen, la grekan mi neniam gustumis kaj decidis antaŭenpaŝi kaj lerni kiel fari ĝin. La recepto surprizis min pro la facileco kaj malmultaj ingrediencoj por bona plezuriga rezulto. Se vi neniam vizitis Grekujon kaj volas manĝi greke, ne hezitu fari ĝin! Se vi estas greko kaj jam konas la recepton ankaŭ sciigu al mi vian impreson pri mia recepto!

Ingrediencoj (por ses tolmoj)

  1. 1 cepo
  2. 1 taso da rizo (ronda grajno)
  3. 8 folioj de folibetoj (ne rompitaj, estu zorgema)
  4. 1 citrono
  5. 1/2 taso da olivoleo
  6. 1 ajlero
  7. 1 kulereto da aneto
  8. salo

Paŝoj:

  1. Unue fajne tranĉu la cepon, aldonu ĝin kun iom da oleo en poto kaj poste aldonu la rizon antaŭe lavita por forigi ĝian amelon. Kuiru ĝin malrapide kelkajn minutojn kaj aldonu al ĝi kvar tasojn da varma akvo (aŭ kvar tasojn da vegetaĵa likvaĵo). Ŝtopu kaj lasu ĝin boli.
  2. Dume preparu la saŭcon per kiu ni ŝmiros la dolmojn. Elpremu la citronon, fajne tranĉu la ajleron kaj same la aneton, aldonu la duontason da oleo kaj iom da salo. Ĉion miksu per forko kaj konservu.
  3. Lavu la foliojn de folibeto zorgeme, tranĉu kaj forigu la tigojn kaj nur lasu la verdan parton.
  4. Metu la foliojn en varman akvon nur kvin minutojn maksimume. Preparu ujon kun malvarma akvo por meti tie la folibet-foliojn tuj post la forigo el la varma akvo.
  5. Kun iom da zorgo disfaldigu la foliojn vertikale al vi kaj aldonu al ĝi kuleron da rizo proksime al la malsupra parto de la folio (lasu malplene ĉirkaŭ tri fingrojn) sed en la centro de la folio. Ĉiuflanke almenaŭ estu liberaj du fingroj.
  6. Post tio ni devos envolvi la rizon unue ambaŭflanke, poste la pecon kiun ni lasis libera en la malsupra parto kaj fine, ni envolvos/rulos malrapide supren ĝis la rulaĵo estu fermita. La malsekeco de la rizo kaj la folio de folibeto utilos por ke ĝi restu alkroĉita kaj ne rompiĝu.
  7. Servu sur telero, ornamu laŭplaĉe kaj ŝmiru per la saŭco kiun ni antaŭe preparis!

 Bonan apetiton! 

Vegana kirlovaĵo el tofuo

Saluton! En la lastaj tagoj mi trajnvojaĝis tra Benelukso (Belgio, Nederlando kaj Luksemburgio) kun mia koramiko. Tie ni plejparte manĝis ekstere, ne hejme, kaj tiel ni adaptiĝis al la lokaj manĝkutimoj, kompreneble, laŭ vegana versio.

Lastatempe mi ne plu provadis imiti tradiciajn pladojn kun bestodevenaĵoj sed simple manĝadis legomojn, cerealojn kaj fruktojn. Tamen, ĉi foje mi vidis en ĉarma kaj bonveniga restoracio je kelkaj paŝoj de la Centra Oficejo de UEA en Roterdamo, ke en ĝia manĝkarto aperas vegana kirlovaĵo kiun mi tuj decidis frandi!

Ofte oni kritikas la veganojn kiuj ŝatas imiti la bestodevenajn produktojn. Veganoj, laŭetike, kontraŭas ĉian ekspluatadon, sed tio ne signifas ke ili ne sopiras je tiaj iamaj manĝaĵoj kiuj ofte memorigas niajn plej fruajn jarojn. Tial, se besto ne suferas, kial ne fari tiajn imitaĵojn?

Tiu ĉi plado estas tiel facile farebla samkiel la tradicia kirlovaĵo. Por ĝi minimume ni nur bezonas tofuon, salon kaj kurkumon. Preferindas la uzo de la ”barata nigra salo” (konata kiel Kala Namak) ĉar ĝi estas tre riĉa je sulfuro kaj gustas je ovo, kio pli realigos nian imitaĵon. Ĝi aĉeteblas ĉe barataj kaj veganaj vendejoj en multaj landoj aŭ per intereto ankaŭ.

 

Ingrediencoj (por du uloj):

  1. 225 gr da malmola tofuo
  2. Kulereto da kurkumo
  3. Kulereto da salo (se Kale Namak eĉ pli bone)
  4. Plantoleo (mi uzis olivan)
  5. Kulero da ŝenoprazo

 

Paŝoj:

  1. Diserigu la tofuon per forko por ke ĝi aspektu kiel kirlovaĵo. Estu zorgema kaj ne tro diserigu ĝin.
  2. Aldonu la diserigitan tofuon al pato (fritilo) jam varma kaj kun iom da oleo. Same aldonu la aliajn ingrediencojn. Ĉion kirlu bone dum kvin-dek minutoj je meza fajro ĝis ĉiuj ingrediencoj sameciĝu.
  3. Servu tuj surtelere. Mi ornamis ĝin per ŝenoprazo kaj nigra pipro kaj manĝis kun pano kaj tomato. Ĝi tre bongustis!

Bonan apetiton!