Maroka fazeolaĵo “Lubia”.

Saluton! Antaŭ kelkaj semajnoj mi gastigis esperantan marokan amikon kiun mi ekkonis antaŭ 7 jaroj kaj kiun mi akceptis hejme por la dua fojo! Mi pensis fari ion marokan por gustumi tiun kuirarton kiun mi apenaŭ konas krom la tipaj humuso aŭ falafelo. Tre surprize mi trovis facile fareblan fazeolaĵon kiun mi ŝategis kaj hodiaŭ mi denove faris kaj volas nepre kundividi ĝin kun vi ĉiuj! Por la plado ni nur bezonos simplajn ingrediencojn!

Ingrediencoj:
500 gr da blankaj fazeoloj
1 Cepo
1 Verda kapsiko
3 maturaj tomatoj
1 kulero tra freŝa koriandro
1 kulero da freŝa petroselo
2-3 ajleroj
Olivoleo, akvo kaj salo.
Kurkumo kaj kumino laŭplaĉe (sed ne tro)

Paŝoj:
Unue ni devas enakvigi la fazeolojn minimume dum tuta antaŭa nokto.
Tranĉu la cepon, la kapsikon kaj la tomaton. Aldonu iom da olivoleo sur la kaserolo kaj verŝu la tranĉaĵojn kaj lasu ilin friti. Post tio ĉi aldonu la petroselon kaj la koriandron, la spicojn kaj la salon.
Aldonu la fazeolojn, movu ĉion bone kaj aldonu sufiĉe da akvo. Ŝtopu la kaserolon kaj lasu ĝin kuiri ĝis la fazeolojn estu sufiĉe molaj kaj la likvaĵo malpliiĝu kaj plidensiĝu. Kaj jen ĉio!

Kaj bonan apetiton!

Florbrasikaj kneloj kun tomatsaŭco kun bazilio

Saluton karaj! Jen nova recepto post longa dormado kutima ĉe mi! Vintre mi estas kaj okupata kaj laca kaj ne multe emas kuiri ĉe mi, tial do, mi longe paŭzas ĝis alveno de la printempo! Jen bongustaj kneloj el florbrasiko kiujn mi faris por la menuo de la restoracio kie mi laboras kaj ili tre ŝatis. Tial okaze de vizito de esperanta amiko el Marsejlo, mi faros ilin denove kaj volas kundividi ilin kun vi. Mi manĝis ilin kun rostitaj terpomoj sed kun blanka rizo ankaŭ bonegas 🙂

Ingrediencoj:

  • 1 florbrasiko
  • Peco da malnova pano
  • Glaso da raspita pano
  • Glaso da akvo aŭ sensukera vegetaĵa lakto
  • Spicoj: kumino, origano, petroselo, kurkumo
  • Faruno
  • Cepo
  • Oleo
  • Salo

Paŝoj:

  • Unue diserigu la malnovan panon aldonante akvon al ĝi aŭ vegetaĵan lakton kaj lasu ĝin ripozi por moliĝo.
  • Poste metu la florbrasikon en varman bolantan akvon kaj kiam ĝi estu mola forigu el la fajro kaj manpremu bone.
  • Dum la florbrasiko ankoraŭ ne moliĝas, tranĉu tre fajne cepon kaj fritu. Konservu kaj aldonu al la jam premita florbrasiko.
  • Miksu kaj la panon kaj la florbrasikon kaj spicu laŭplaĉe. Nun se la pasto estas tre mola aldonu iom da raspita pano sed ne tro ĉar la kneloj povus iĝi tre malmolaj post fritado.
  • Faru bulojn, ŝmiru per faruno kaj fritu en abunda varma oleo. Servu kun saŭco.

Knela saŭco:
1 doso da tomatsaŭco
2 ajleroj
Duoncepo
Olivoleo
Bazilio (ĉu natura aŭ sekigita)

Paŝoj:
Fritu la cepon (ĝi estu fajne tranĉita) kun la ajlo.
Aldonu la tomatsaŭcon, la bazilion, iom da salo kaj lasu varmiĝi kelkajn minutojn!

Musliaj stangetoj!

Vi estas en via laboro/ekskurso/prelego/ktp kaj emas manĝeti sed nur eblas aĉeti multsukeraĵojn de iu maŝino. “Damne!” vi pensas dum via stomako petas atenton kaj la horloĝo indikas ke ankoraŭ mankas tempo ĝis la tag-/vespermanĝo. Tiam vi memoros tiun ĉi recepton kaj komprenos vian eraron kiam vi pigris kaj ne preparis tiun ĉi recepton. Nun, ke vi revenas al ni, sekvu la venontan recepton 😉

Tempo:

  • 30 minutoj

Komplikeco:

  • malalta

Ingredientoj por 24 stangetoj:

  • 3 bananoj tre maturaj;
  • 100 gramoj da sekitaj daktiloj sen semoj;
  • 500 gramoj da aven-flokoj;
  • 50 gramoj da heliantaj semoj;
  • 50 gramoj da kukurbaj semoj;
  • 100 gramoj da haketitaj aveloj;
  • 4 manĝkuleroj da pomkompoto sensukera.

 

Paŝoj:

  1. Varmigu la fornon ĝis 180ºC kaj preparu bak-pleton kun bakpapero.
  2. Premu la bananojn per forko ĝis havi paston homogenan.
  3. Tranĉu la daktilojn en malgrandaj eroj.
  4. Miksu la flokojn, semojn, avelojn kaj daktilojn en iu bovlo. Aldonu la paston kaj uzu viajn manojn ĝis vi havos homogenan miksaĵon. Faru same kun la pomkompoto ĝis vi havos gluan paston.
  5. Metu la paston sur la bakpapero, etendu ĝin kaj donu formon tiel ke sia dikeco estos pli malpli 1-centimetra.
  6. Tranĉu en stangetoj kaj konservu ilin en hermetika ujo kaj en fridujo.
  7. Ne plu suferu mankon de malmultsukeraj veganaj bongustaj manĝetajoj!

Recepto kaj kunlaboro de “Charles Fischer” el Germanio! 

Klasika fromaĝkuko el soj-jogurto, biskvitoj kaj marmelado el framboj

Saluton amikoj, post iom da ripozado mi revenas kun ĉi bongustega kaj tre facila kuko. Temas pri la klasika fromaĝkuko kun marmelado en la supro. Ĝin ni povas tre rapide fari kvankam eble kelkajn ingrediencojn oni devus trovi en specialaj lokoj kiaj agaragaro (vegetaĵa alg-devena gelateno). Mi rekomendas ĝin ankaŭ okaze de datrevenoj 🙂

Ingrediencoj:

  • 12 biskvitoj (Maria-stilaj biskvitoj)
  • 50 gr da centprocenta vegetaĵa margarino
  • 3 etaj jogurtoj el sojo aŭ 150 gr.
  • 1 taso da vegetaĵa lakto
  • 1 kulero da agaragaro pulvorigita.
  • 3 supkuleroj da citronsuko
  • Marmelado el framboj aŭ fragoj.

Paŝoj:

  • Unue ni devas krei la bazon de nia fromaĝkuko. Por tio varmigu la margarinon kaj pulvorigu bone la biskvitojn. Miksu ambaŭ kaj kirlu ĝis plena sameciĝo. Disfaldigu ĝin en la bazo de ronda muldilo (mi uzis 22centimetran muldilon).
  • Sekve varmigu la tason da vegetaĵa lakto kun la kulero da agaragaro kaj lasu surfajre ĝis ekbolo. Dume movetu ĝin konstante. Elfajrigu, aldonu la jogurton kaj la citronsukon, movu bone kaj metu en la muldilon.
  • Lasu ĝin malvarmiĝi kaj la miksaĵo el lakto kaj jogurto malmoliĝos pli malpli post 30 minutoj. Prenu la marmeladon, movu ĝin energie kaj per ilo (ĉu spatelo, ĉu kulero) kovru la supron de nia fromaĝkuko kaj lasu ĝin malvarmiĝi iom pli.

Kaj jen ĉio! Nia kuko estas preta! Bonan apetiton!

Humuso, mezorienta kikerkaĉo

Humuso estas mola, sana, delica kaj tre facile preparebla kikerkaĉo aŭ pureo. Ĝin oni faris jam en antikva Egiptujo kaj bongustegas akompanita de olivoj, naĉoj, krudaj legomoj, kun pita-pano aŭ kiel ŝmiraĵo. La kikerpureo estas bona maniero manĝi legumojn kiam varmas. Humuson mi ŝatas ĉar ĝi estas satiga kaj plenas je diversaj proprecoj tipaj de legumeno kiaj kikeroj: vitaminoj A, B6, C, E kaj K, kalcio, fosforo, kalio, zinko, magnezio, fero kaj natrio.
La kutima recepto enhavas sezampaston kiun oni kutime nomas ”tahini” sed mi mem ne havis tiumomente sed ja sezam-semojn. Vi povas facile uzi unu el ili aŭ eĉ entute ne uzi sezamon. La rezulton vi same ŝatos!

Vi povas enakvigi kikerojn tutan antaŭan nokton kaj poste kuiri ilin sed mi preferis aĉeti endosigitajn kuiritajn kikerojn por ne malŝpari tempon.

Ingrediencoj:

  • 160 gramoj da krudaj kikeroj aŭ 400 gramoj da kuiritaj kikeroj
  • citronsuko de unu citrono
  • 1 kulero da sezampastotahini
  • 1 ajlero
  • ½ kulereto da salo
  • ½ kulereto da kumino
  • ½ taso da akvo
  • Iomete da olivoleo
  • 1 kulero da papriko

Paŝoj:

  • Se vi uzos krudajn kikerojn, enakvigu ilin inter 8 kaj 12 horoj en abunda akvo, verŝu ilin en la kaserolon kiam la akvo bolu kaj kuiru ilin dum 2 horoj kaj aldonu salon laŭplaĉe.
  • Verŝu la kikerojn en miksparaton kun la citronsuko, la sazampasto, ajlero, salo, kumino kaj akvo kaj kirlu ĝis akiro de sameca pureo. Se vi ŝatas ĝin pli likvece, aldonu iom pli da akvo.
  • Por servi ĝin uzu teleron aŭ bovlon kaj per kulero kreu faltojn, aldonu olivoleon kaj paprikon. Laste, elektu kun kio vi manĝos ĝin! Mi manĝis kun rostita pano!

Panakoto el kokoslakto kun mango-saŭco

Hej! Saluton! Panakoto (itale ”panna cotta” t.e. ”kuirita laktokremo”) estas unu el la plej konataj italaj desertoj kiu estas tre facile farebla kaj bongusta! Tamen, mi provis fari ĝin sensukcese antaŭ eble unu jaro kaj iom pli 🙂 La rezulto estis stranga malmolaĵo, pli malmola ol betono! Kaj jes! kulpis la agaragaro! Agaragaro estas algaĵo kiu funkcias kiel vegetaĵa gelateno sed sufiĉas nur kelkaj grameto da ĝi por bone fari recepton! Se oni mispaŝas kaj aldonas plian eron, ĝi malmoligas ĉion! Tial do, mi ankaŭ antaŭsciigas vin pri tio! Agaragaron vi povus aĉeti en vegana/vegetarana vendejo, ĉe Carrefour (almenaŭ en Hispannio) kaj ankaŭ per interreto!
Tiu ĉi recepto estas por kvin homoj, tial, ĝi estas ideala por komuna amika aŭ familia manĝo! Ĝuu!

Ingrediencoj:

Paŝoj:

  • Metu ĉiujn ĉi ingrediencojn en kaserolon sur meza fajro kaj movu ofte ĝis ekbolo. Lasu ĝin 30 sekundojn pli kaj forigu el la fajro.
  • Verŝu sur vitrajn glasojn kaj malvarmigu minimume 4 horojn friduje.

 

Marmelado:

Ingrediencoj:

  • 170 gr da mango-karno
  • 30 ml da akvo
  • 15 ml da citronsuko
  • 45 gr da sukero

Paŝoj:

  • Senŝeligu kaj dispecigu la mangon je etaj pecoj.
  • Metu la akvon, sukeron kaj citronsukon en kaserolon. Miksu bone kaj aldonu la mangopecojn.
  • Lasu ĝin je malalta fajro ĝis la mango estu tre malmola. Kontrolu tuŝante la mangon per forko.
  • Elfajrigu, malvarmigu kaj filtru.
  • Nur ornamu la panakoton verŝante ĝin sur la glasetoj!