Gumbo, el la sud-Usona kuirarto.

Saluton verduloj! Jam ekde pasinta jaro mi volis fari ĉi pladon sed mi iom atendadis. Principe temas pri iom komplika manĝaĵo ĉar la guŝojn oni devus enakvigi kaj kuiri, kaj ili estas sufiĉe malmolaj! Tial mi decidis aĉeti kuiritajn por simpligi la paŝojn. Mi diros ke mi amegas preskaŭ ĉiajn guŝojn kaj mi povus manĝi ilin tage kaj nokte senlace kaj senhalte. Post mia malkovro de la sudusona ‘nigrula’ kuirarto, mi nur bedaŭras ke tiaj pladoj ne vaste famiĝis favore al rapidmanĝaĵoj kaj ni primokas ilin pro manko de bona kuirarto, kio ne tute veras! Tie estas multaj tradiciaj manĝaĵoj kaj ni povas fari tute veganajn versiojn. Mi faris manĝaĵon el Luiziano kaj usona Meksika golfo kiu nomiĝas Gumbo . Temas pri tre ampleksa manĝaĵo ĝi varias de unu loko al alia, ne rigida aŭ strikta rilate al ĝiaj ingrediencoj uzendaj. Plejparte oni preparas ĝin dum la malvarmaj monatoj. Ni diru ke temas pri densa supo kun fiŝaĵoj, viandoj, marfruktoj aŭ nur vegetaĵoj. Ĉi lastan ni faros.

Por tiu ĉi recepto ni uzos tri malsamajn guŝojn: nigrajn fazeolojn, blankajn fazeolojn kaj kikerojn. Kiel mi diris antaŭe por ne komplikigi min, mi aĉetis dosojn kun jam kuiritaj guŝoj. Ankaŭ ni devos fari rostitan saŭcon (france roux), kio estas vere simpla. Kaj alia grava ingredienco estas la gomboj, kiun oni pli konas en Afriko kaj en kelkaj landoj amerikaj. Tamen, se vi ne trovus ĝin facile, uzu terpomojn anstataŭe.

Ingrediencoj:

  • 60 ml da olivoleo
  • 30 gramoj da faruno
  • 1 mezgranda cepo, tranĉita
  • 1 verda kapsiko, kvadrate tranĉita
  • 1 celeri-tigo, tranĉita
  • 3 ajleroj, tranĉitaj
  • 200 gramoj da gomboj, tranĉitaj
  • 400 gramoj da tomatsaŭco
  • 600 ml da vegetaĵa likvaĵo
  • 8 ĉampinjonoj, tranĉitaj kvarone
  • ½ kulereto da seka timiano
  • ½ kulereto da ĉilia pulvoro (aŭ Kajena pipro)
  • 2 laŭro-folioj
  • 330 gramoj da miksitaj guŝoj
  • Salo laŭplaĉe
  • Pipro laŭplaĉe
  • Rizo por manĝi kun la gumbo
  • Petroselo freŝa (opcie)

Paŝoj:

  • Unue varmigu grandan poton mezfajre. Aldonu la oleon kaj sekve la farunon. Konstante kirlu per spatelo dum 10-15 minutoj ĝis la faruno rostiĝu kaj akiru brunan koloron.
  • Aldonu la cepon al la rostsaŭco kaj kirlu malrapide dum kelkaj minutoj. Poste aldonu la kapsikon, celeri-tigon, ajlerojn kaj gombon. Lasu ĝin friti kaj fojfoje kirlu, dum 10 aŭ 15 minutoj ĝis la legomoj estu molaj.
  • Aldonu la tomatsaŭcon, 600 ml da vegetaĵa likvaĵo (en multaj landoj eblas aĉeti en supermarktoj), ĉampinjonojn, timianon, laŭron kaj kajenan pipron. Lasu ĝin boli je meza fajro dum dudek minutoj.
  • Aldonu la guŝojn kaj plu lasu ĝin kuiri 10 minutojn pli. Servu kun rizo kaj laŭplaĉe ornamu per petroselo.

 Bonan apetiton!

Vegana kirlovaĵo el tofuo

Saluton! En la lastaj tagoj mi trajnvojaĝis tra Benelukso (Belgio, Nederlando kaj Luksemburgio) kun mia koramiko. Tie ni plejparte manĝis ekstere, ne hejme, kaj tiel ni adaptiĝis al la lokaj manĝkutimoj, kompreneble, laŭ vegana versio.

Lastatempe mi ne plu provadis imiti tradiciajn pladojn kun bestodevenaĵoj sed simple manĝadis legomojn, cerealojn kaj fruktojn. Tamen, ĉi foje mi vidis en ĉarma kaj bonveniga restoracio je kelkaj paŝoj de la Centra Oficejo de UEA en Roterdamo, ke en ĝia manĝkarto aperas vegana kirlovaĵo kiun mi tuj decidis frandi!

Ofte oni kritikas la veganojn kiuj ŝatas imiti la bestodevenajn produktojn. Veganoj, laŭetike, kontraŭas ĉian ekspluatadon, sed tio ne signifas ke ili ne sopiras je tiaj iamaj manĝaĵoj kiuj ofte memorigas niajn plej fruajn jarojn. Tial, se besto ne suferas, kial ne fari tiajn imitaĵojn?

Tiu ĉi plado estas tiel facile farebla samkiel la tradicia kirlovaĵo. Por ĝi minimume ni nur bezonas tofuon, salon kaj kurkumon. Preferindas la uzo de la ”barata nigra salo” (konata kiel Kala Namak) ĉar ĝi estas tre riĉa je sulfuro kaj gustas je ovo, kio pli realigos nian imitaĵon. Ĝi aĉeteblas ĉe barataj kaj veganaj vendejoj en multaj landoj aŭ per intereto ankaŭ.

 

Ingrediencoj (por du uloj):

  1. 225 gr da malmola tofuo
  2. Kulereto da kurkumo
  3. Kulereto da salo (se Kale Namak eĉ pli bone)
  4. Plantoleo (mi uzis olivan)
  5. Kulero da ŝenoprazo

 

Paŝoj:

  1. Diserigu la tofuon per forko por ke ĝi aspektu kiel kirlovaĵo. Estu zorgema kaj ne tro diserigu ĝin.
  2. Aldonu la diserigitan tofuon al pato (fritilo) jam varma kaj kun iom da oleo. Same aldonu la aliajn ingrediencojn. Ĉion kirlu bone dum kvin-dek minutoj je meza fajro ĝis ĉiuj ingrediencoj sameciĝu.
  3. Servu tuj surtelere. Mi ornamis ĝin per ŝenoprazo kaj nigra pipro kaj manĝis kun pano kaj tomato. Ĝi tre bongustis!

Bonan apetiton!

Maroka fazeolaĵo “Lubia”.

Saluton! Antaŭ kelkaj semajnoj mi gastigis esperantan marokan amikon kiun mi ekkonis antaŭ 7 jaroj kaj kiun mi akceptis hejme por la dua fojo! Mi pensis fari ion marokan por gustumi tiun kuirarton kiun mi apenaŭ konas krom la tipaj humuso aŭ falafelo. Tre surprize mi trovis facile fareblan fazeolaĵon kiun mi ŝategis kaj hodiaŭ mi denove faris kaj volas nepre kundividi ĝin kun vi ĉiuj! Por la plado ni nur bezonos simplajn ingrediencojn!

Ingrediencoj:
500 gr da blankaj fazeoloj
1 Cepo
1 Verda kapsiko
3 maturaj tomatoj
1 kulero tra freŝa koriandro
1 kulero da freŝa petroselo
2-3 ajleroj
Olivoleo, akvo kaj salo.
Kurkumo kaj kumino laŭplaĉe (sed ne tro)

Paŝoj:
Unue ni devas enakvigi la fazeolojn minimume dum tuta antaŭa nokto.
Tranĉu la cepon, la kapsikon kaj la tomaton. Aldonu iom da olivoleo sur la kaserolo kaj verŝu la tranĉaĵojn kaj lasu ilin friti. Post tio ĉi aldonu la petroselon kaj la koriandron, la spicojn kaj la salon.
Aldonu la fazeolojn, movu ĉion bone kaj aldonu sufiĉe da akvo. Ŝtopu la kaserolon kaj lasu ĝin kuiri ĝis la fazeolojn estu sufiĉe molaj kaj la likvaĵo malpliiĝu kaj plidensiĝu. Kaj jen ĉio!

Kaj bonan apetiton!

Florbrasikaj kneloj kun tomatsaŭco kun bazilio

Saluton karaj! Jen nova recepto post longa dormado kutima ĉe mi! Vintre mi estas kaj okupata kaj laca kaj ne multe emas kuiri ĉe mi, tial do, mi longe paŭzas ĝis alveno de la printempo! Jen bongustaj kneloj el florbrasiko kiujn mi faris por la menuo de la restoracio kie mi laboras kaj ili tre ŝatis. Tial okaze de vizito de esperanta amiko el Marsejlo, mi faros ilin denove kaj volas kundividi ilin kun vi. Mi manĝis ilin kun rostitaj terpomoj sed kun blanka rizo ankaŭ bonegas 🙂

Ingrediencoj:

  • 1 florbrasiko
  • Peco da malnova pano
  • Glaso da raspita pano
  • Glaso da akvo aŭ sensukera vegetaĵa lakto
  • Spicoj: kumino, origano, petroselo, kurkumo
  • Faruno
  • Cepo
  • Oleo
  • Salo

Paŝoj:

  • Unue diserigu la malnovan panon aldonante akvon al ĝi aŭ vegetaĵan lakton kaj lasu ĝin ripozi por moliĝo.
  • Poste metu la florbrasikon en varman bolantan akvon kaj kiam ĝi estu mola forigu el la fajro kaj manpremu bone.
  • Dum la florbrasiko ankoraŭ ne moliĝas, tranĉu tre fajne cepon kaj fritu. Konservu kaj aldonu al la jam premita florbrasiko.
  • Miksu kaj la panon kaj la florbrasikon kaj spicu laŭplaĉe. Nun se la pasto estas tre mola aldonu iom da raspita pano sed ne tro ĉar la kneloj povus iĝi tre malmolaj post fritado.
  • Faru bulojn, ŝmiru per faruno kaj fritu en abunda varma oleo. Servu kun saŭco.

Knela saŭco:
1 doso da tomatsaŭco
2 ajleroj
Duoncepo
Olivoleo
Bazilio (ĉu natura aŭ sekigita)

Paŝoj:
Fritu la cepon (ĝi estu fajne tranĉita) kun la ajlo.
Aldonu la tomatsaŭcon, la bazilion, iom da salo kaj lasu varmiĝi kelkajn minutojn!

Musliaj stangetoj!

Vi estas en via laboro/ekskurso/prelego/ktp kaj emas manĝeti sed nur eblas aĉeti multsukeraĵojn de iu maŝino. “Damne!” vi pensas dum via stomako petas atenton kaj la horloĝo indikas ke ankoraŭ mankas tempo ĝis la tag-/vespermanĝo. Tiam vi memoros tiun ĉi recepton kaj komprenos vian eraron kiam vi pigris kaj ne preparis tiun ĉi recepton. Nun, ke vi revenas al ni, sekvu la venontan recepton 😉

Tempo:

  • 30 minutoj

Komplikeco:

  • malalta

Ingredientoj por 24 stangetoj:

  • 3 bananoj tre maturaj;
  • 100 gramoj da sekitaj daktiloj sen semoj;
  • 500 gramoj da aven-flokoj;
  • 50 gramoj da heliantaj semoj;
  • 50 gramoj da kukurbaj semoj;
  • 100 gramoj da haketitaj aveloj;
  • 4 manĝkuleroj da pomkompoto sensukera.

 

Paŝoj:

  1. Varmigu la fornon ĝis 180ºC kaj preparu bak-pleton kun bakpapero.
  2. Premu la bananojn per forko ĝis havi paston homogenan.
  3. Tranĉu la daktilojn en malgrandaj eroj.
  4. Miksu la flokojn, semojn, avelojn kaj daktilojn en iu bovlo. Aldonu la paston kaj uzu viajn manojn ĝis vi havos homogenan miksaĵon. Faru same kun la pomkompoto ĝis vi havos gluan paston.
  5. Metu la paston sur la bakpapero, etendu ĝin kaj donu formon tiel ke sia dikeco estos pli malpli 1-centimetra.
  6. Tranĉu en stangetoj kaj konservu ilin en hermetika ujo kaj en fridujo.
  7. Ne plu suferu mankon de malmultsukeraj veganaj bongustaj manĝetajoj!

Recepto kaj kunlaboro de “Charles Fischer” el Germanio! 

Klasika fromaĝkuko el soj-jogurto, biskvitoj kaj marmelado el framboj

Saluton amikoj, post iom da ripozado mi revenas kun ĉi bongustega kaj tre facila kuko. Temas pri la klasika fromaĝkuko kun marmelado en la supro. Ĝin ni povas tre rapide fari kvankam eble kelkajn ingrediencojn oni devus trovi en specialaj lokoj kiaj agaragaro (vegetaĵa alg-devena gelateno). Mi rekomendas ĝin ankaŭ okaze de datrevenoj 🙂

Ingrediencoj:

  • 12 biskvitoj (Maria-stilaj biskvitoj)
  • 50 gr da centprocenta vegetaĵa margarino
  • 3 etaj jogurtoj el sojo aŭ 150 gr.
  • 1 taso da vegetaĵa lakto
  • 1 kulero da agaragaro pulvorigita.
  • 3 supkuleroj da citronsuko
  • Marmelado el framboj aŭ fragoj.

Paŝoj:

  • Unue ni devas krei la bazon de nia fromaĝkuko. Por tio varmigu la margarinon kaj pulvorigu bone la biskvitojn. Miksu ambaŭ kaj kirlu ĝis plena sameciĝo. Disfaldigu ĝin en la bazo de ronda muldilo (mi uzis 22centimetran muldilon).
  • Sekve varmigu la tason da vegetaĵa lakto kun la kulero da agaragaro kaj lasu surfajre ĝis ekbolo. Dume movetu ĝin konstante. Elfajrigu, aldonu la jogurton kaj la citronsukon, movu bone kaj metu en la muldilon.
  • Lasu ĝin malvarmiĝi kaj la miksaĵo el lakto kaj jogurto malmoliĝos pli malpli post 30 minutoj. Prenu la marmeladon, movu ĝin energie kaj per ilo (ĉu spatelo, ĉu kulero) kovru la supron de nia fromaĝkuko kaj lasu ĝin malvarmiĝi iom pli.

Kaj jen ĉio! Nia kuko estas preta! Bonan apetiton!