Veganaj meksikaj faĥitoj el sojo, fazeoloj kaj kokbeko

Saluton verduloj! Hieraŭ mi regalis esperantan amikon per faĥitoj! Mi kutime ŝategas fazeolojn kaj kuiras ilin ne gravas ĉu vintras aŭ someras. Ili ĉiam bonvenas sed mi konscias ke ili estas sufiĉe pezaj dum pli varmaj tagoj do mi decidis aldoni kokbekon por ke la faĥitoj estu pli freŝaj. La recepton mi volas kundividi kun vi, kiun mi tre simple faris sed samtempe estas bongustegaj. 

Por la faĥitoj vi bezonos meksikajn tortiljojn. Almenaŭ en Hispanio ili troviĝas en preskaŭ ĉiuj grandaj supermarktoj, inkluzive de internaciaj kiaj Lidl, DIA kaj Carrefour. Ankaŭ mi uzis teksturigitan sojon kiun mi aĉetis en vegana vendejo. Se vi konas iun veganan vendejon, tre certege tie troviĝos. Se ne, eblas aĉeti interrete aŭ simple uzu alian ingrediencon anstataŭ sojo. Povus esti kukurbeto tranĉita kvadratete.

Ingrediencoj:

  • 100 gr da ‘dika’ teksturigita sojo.
  • 400 gr da kuiritaj fazeoloj (prefere nigraj aŭ ruĝaj) kuiritaj
  • 1 cepo
  • 1 ruĝa kapsiko
  • 1 verda kapsiko
  • Oleo
  • Tomatsaŭco
  • Salo kaj spicoj: origano, kumino, petroselo.

Paŝoj: 

  1. Faru sofriton kun oleo, la cepo kaj la kapsikoj tranĉitaj kaj sekve aldonu la sojon, movu iomete kaj aldonu akvon kiu ne plene kovru la sojon, iom da salo kaj lasu ĝin kuiri ĝis ekbolo.
  2. Aldonu la tomatsaŭcon.
  3. Post la ekbolo aldonu la fazeolojn  kaj spicu laŭplaĉe. Se necesas aldonu iom pli da akvo, movu ĉion bone kaj lasu mezfare ĝis la kuiraĵo iĝu pli densa.
  4. La preparaĵon metu sur varmigitan tortiljon kaj sekve la kokbekon. Se vi havas avokadon ankaŭ aldonu 😉 Kaj fermu ĝin por manĝi!

Kokbeko:

Kokbeko konsistas el tranĉitaj tomatoj (etaj kvadratoj), cepo, freŝa koriandro, citronsuko kaj salo. Tranĉu ĉion, konservu en la sama ujo friduje. 

 

Mi nun nur deziras al vi Bonan apetiton!

Veganaj kneloj el tofuo

Hej saluton! Mi iom cerbumis kiun recepton mi preparu por ĉi semajno por vi kaj mi memoris ke en libro pruntedonita al mi mi trovis ‘interesajn’ manĝaĵojn kiujn mi povus lerni fari. Temas ĝenerale pri ajurvedaĵoj kaj malgraŭ tio ke mi skeptikas pri universalaj energioj ktp, mi kredas ke tiuj manĝaĵoj proponitaj ja bonas por la sano, estas tre nutrigaj, relative simple fareblaj, kaj, kio plej gravas, tute veganaj! 

Viandobulojn (mi preferas uzi ankaŭ la esperantan vorton ”kneloj”n ĉar en ĝi tute mankas la vorto ‘viando’ kio plej ĝustus por veganaj vegetaĵaj buloj) eblas trovi en multaj diversaj naciaj kuirartoj kun malsamaj receptoj, saŭcoj kaj garnaĵoj.

Se vi volas fari ilin sed vi ankoraŭ iomete dubetas, ne hezitu lasi komenton sube kaj mi provos vin helpi 😉 Ankaŭ ĉi tie vi trovos saŭcon kiun mi proponas, ĝi same tre bongustas. Manĝu la knelojn kun rizo kaj avokado kaj vi eĉ pli ŝatos!!!

 

Ingrediencoj:

  • 500 gramoj da tofuo
  • 1 karoto raspita, ajlo kaj petroselo (povas esti sekigitaj)
  • Raspita pano
  • Sojsaŭco
  • 2 kuleroj da rostita sezamo
  • Kurkumo kaj kumino opcie kaj laŭplaĉe
  • Blanka faruno
  • Oleo por friti

Paŝoj:

  • Diserigu la tofuon per forko aŭ eĉ per viaj propraj manoj. Raspu la karoton kaj forigu ĝian sukon. Aldonu ĝin al la tofuo kune kun la petroselo, raspita pano, sezam-semoj, ajlo kaj kelkaj gutoj da sojsaŭco.
  • Miksu ĉion bone kaj donu knelecan formon al la pasto. Se la konsisto estus likveca, aldonu iom pli da raspita pano. Kovru ilin per faruno.
  • Varmigu la oleon kaj fritu ilin. Konservu ilin por la saŭco kiun sekve mi donas al vi:

Saŭco:

Ingrediencoj:

  • Cepo
  • Celerio
  • Karoto
  • 4 maturaj tomatoj
  • Manpleno da pizoj
  • 2 supkuleroj da sukero
  • kulereto da salo
  • Oleo

Paŝoj:

  • Fajne tranĉu la celerion, la karoton kaj la cepon kaj kun kelkaj kuleroj da oleo fritu en poto dum 5 minutoj pli malpli, movante ĝin.
  • Raspu la tomatojn kaj metu en la poton kaj sekve aldonu la sukeron por ke la saŭco ne estu tro acida pro la temato kaj sekve glason da akvo.
  • Aldonu la pizojn kaj lasu la saŭcon kuiriĝi ĝis la karotoj estu molaj.

 

Ĉio jam pretas! Manĝu ilin kun garnaĵo, prefere estu rizo 🙂 Kiel kutime, mi deziras al vi bonan apetiton!!!

Veganaj pik-stangetoj el legomoj kaj ĉampinjonoj kun pesto!

Saluton amikoj! Antaŭ kelkaj semajnoj mi vizitis veganan restoracion kiu malfermis siajn pordojn antaŭ unu jaro ( Veggie Levél Bistro) kaj lastatempe iĝis fama inter madridaj veganoj kaj neveganoj ankaŭ. Ĝi havas precipe krudveganajn pladojn sed en nur. Ni, tri esperantistoj, mendis bongustan entreon kiu konsistas el pikstangetoj el ĉampinjonoj kaj aliaj vegetaĵoj kun pesto. Mi surpriziĝis pro la bongusteco kaj la facileco ĝin prepari hejme! Mi ne nur faris hejme sed ankaŭ faris por la restoracio kie mi laboras kaj ĉiuj ŝatis 🙂

Tial do, mi volas ankaŭ kundividi ĝin kun vi, por ke vi ankaŭ surprizigu viajn konatojn. Provu fari novajn aferojn 🙂

Por ĉi plado vi bezonos bazajn ingrediecojn plus la stangetojn por trapiki la legomojn.

Ingrediencoj por du stangetoj:

  • 1 kukurbeto
  • 1 ruĝa kapsiko
  • 1 verda kapsiko
  • 6 ĉeriztomatoj
  • 6 ĉampinjonoj

Pesto:

  • Manpleno da bazilio
  • Manpleno da nukso
  • Kulero da olivoleo
  • Salo laŭplaĉe

Paŝoj:

  • Unue tranĉu kvadrate la kapsikojn. Dispartigu la kukurbeton kaj poste tranĉu ĝin lunforme. Ankaŭ duonigu la ĉeriztomatojn. Purigu la ĉampinjonojn subakve.
  • Kirlu la bazilion kun la nuksoj, la olivoleo kaj la salo ĝis kreado de sameca pasto. Tiel iĝos la pesto aldonota al la ĉampinjonoj.
  • Metu la legomojn kaj la ĉampinjonojn sur la lamenan rostilon, ŝprucu iomete da oleo sur ilin, salo kaj movu de tempo al tempo por ke ili ne tro rostiĝu. Kiam ili estos jam pretaj eligu kaj trapiku la stangetojn alternante la legomojn kiel vi mem povas vidi en la foto por buntigi ilin. Fine aldonu la peston al la ĉampinjonoj kaj la stangetoj estos pretaj por ĝuado!

Bonan apetiton!!!

Burgero el kikeroj, tofuo kaj aveno

Hodiaŭ mi volis iom rapide manĝi ĉar mi tre malsatis kaj ne povis atendi por pli ”ellaborita” manĝaĵo. Tio bonas, ĉar tio signifas ke preparado de burgeroj ne postulas tiom da tempo kaj zorgoj kompare kun aliaj manĝaĵoj. La almanĝaĵo estas tio kion tiumomente mi havis en la glaciŝranko kaj mi ĝojis pro la rezulto. Do, mi invitas al vi same aldoni ilin sed se vi havas aliajn aferojn, aldonu tion 😉 

Ingrediencoj:

Por 5 burgeroj

  • 500 gramoj da kuiritaj kikeroj
  • 200 gramoj da aven-flokoj
  • 200 gramoj da tofuo.
  • 1/2 da mezgranda cepo
  • Kulereto da nigra pipro
  • Kulereto da origano
  • Kulereto da petroselo
  • Kulereto da salo
  • Kulero da olivoleo.
  • Panoj por burgeroj

Almanĝaĵoj:

  • Kukurbeto fajne tranĉita.
  • Ĉampinjonoj frititaj sur pato kun ajlero, olivoleo kaj salo.
  • Brokolo boligita kaj muelita.

Paŝoj:

  • Premu la kikerojn en bovlo ĝis ili ĉiuj iĝu kiel kremo sed ne tro likve. Sekve aldonu la cepon sed ete tranĉu ĝin.
  • Tuj poste aldonu la tofuon, disrompu ĝin per viaj propraj manoj kaj spicu per salo, pipro, origano, petroselo, olivoleo.
  • Aldonu la avenflokojn kaj mane movu ĉion bone ĝis kreiĝo de sameca pasto.
  • Metu en la glaciŝrankon dum 15 minutoj proksimume.
  • Dum la pasto estas en la glaciŝranko, fritu la ĉampinjonojn kaj tranĉu la kukurbetojn.
  • Eligu ĝin, donu formon al viaj burgeroj kaj kuiru, muntu ĉion kaj ek! Bonan apetiton!

Veganaj matenmanĝoj: banan-pano!

Esti vegano ne signifas rezigni pri ĉiuj pladoj ekzistantaj en la kuirarta mondo. Simple li/ŝi forlasos tiujn ingrediencojn el besta deveno pro etikaj kialoj; sed ĉiam eblas ilin anstataŭi kaj rekrei la tradician recepton por daŭre ĝui ilin.

Same okazas pri la matenmanĝo. Kutime mi nur matenmanĝas grandegan kruĉon da fruktokirlaĵo (dulitra!) kun kelkaj suplementoj (marakvo, kreatino, proteinoj) sed de tempo al tempo mi ankaŭ preparas panon, biskvitojn aŭ kukon por gluti ĝin matene! Tiamaniere ankaŭ ni rompos tiun miton ke ne eblas ĝui sanan kaj bongustan manĝaĵon kiam oni estas vegano.

Verdire, preskaŭ ne ekzistas limoj kaj nuntempe eblas trovi librojn pri vegana kuirarto kie ajn kaj ankaŭ sur interreto oni trovas multe da informo. Mi nur volas montri kiel facile fari panon aŭ kukon el banano kiu povas esti via matenmanĝo sed certe ekzistas aliaj manĝaĵoj. Mi rekomendas esplori aŭ simple demandu al mi kaj mi donos aliajn receptojn 🙂 

Banano-kuko por matenmanĝoj!

Ingrediencoj:

  1. Bananoj
  2. Margarino
  3. Ĉiao
  4. Kafo (espreso) 
  5. Faruno (blanka kaj nerafinita)
  6. Cinamo 
  7. Bruna sukero

 

Por fari ĉi tiun delican veganan banan-panon, kirlu duonglason da margarino kun duonglaso da nerafinita bruna sukero ĝis ĝi iĝu spongeca. Aliflanke, agitu bone 3 kulerojn da ĉiao-semoj kun ses kuleroj da akvo, kaj aldonu ĝin al la antaŭa miksaĵo.

Faru pureon el du mezgrandaj bananoj aŭ tri malgrandaj, aldonu trionon da espreso kaj kunigu al la ĉefa maso. Laste, nur aldonu farunon (125 g blanka kaj 125 g nerafinita), salon kaj blutitan cinamon. Metu la preparaĵon en la fornon kaj lasu tie dum 30-40 minutoj kaj ĝi estos preta!

Spagetoj kun vegana bolonjezo! (kun filmeto!)

Hodiaŭ mi vekiĝis malfrue, mi planis fari alian pladon sed mi iomete pigris kaj mi tuj pensis pri pli facila kaj rapida recepto, mi serĉis inter miaj produktoj kaj jen! Per malmultaj ingrediencoj kaj bazaj paŝoj, oni povas majeste manĝi ĝis plensatigo! La spagetoj kun bolonjezo estas itala plado kiu iĝis ja internacia. Veganoj ankaŭ povas ĝui ĝin, ni simple uzas fajnan teksturigitan sojon anstataŭ la viando!

 

 

Ingrediencoj:

  • Teksturigita sojo*
  • 4 mezgrandaj  maturaj tomatoj
  • (Tomatsaŭco laŭplaĉe)
  • Karoto (laŭplaĉe)
  • Cepo
  • Ajlero
  • Origano
  • Baziliko
  • Nigra papriko
  • Olivoleo

 

Paŝoj:

  • Senŝeligu la cepon kaj la ajlon, fajne tranĉu ilin kaj metu la ajleron  en la fritilon kun la olivoleo. Lasu ĝin friti kaj poste aldonu la tranĉitan cepon kaj karoton. (Mi mem ne havis karoton ĉemane kaj ne uzis)
  • Kiam la cepo estu travidebla, aldonu manplenon da teksturigita sojo kaj lasu ĝin kuiri kun duonglaso da akvo dum kvin minutoj por ke la sojo hidratiĝu.
  • Dum la sojo hidratiĝas, ni povas lavi la tomatojn kaj rapu, post la kvin minutoj aldonu la raspitan tomaton al la fritilo kaj movu. Mi uzis ankaŭ iom da tomatsaŭco sed ĝi estas nur opcia.
  • Lasu ĝin kuiri mezfajre, aldonu salon, sekigitajn origanon, paprikon kaj bazilikon laŭplaĉe kaj forigu el la fajro.
  • Kaj ĝi jam pretas!!! Aldonu ĝin al viaj spagetoj kaj se vi havas veganan fromaĝon, aldonu! Bonan apetiton! 

 

 

*La teksturigita sojo povas esti dika, mezdika, fajna. Ĝi aĉeteblas en multaj grandaj supermarktoj, veganaj vendejoj kaj ankaŭ per interreto (Amazon). Ĝi ne multe kostas kaj utilas por multaj diversaj pladoj de la vegana kuirarto 🙂