Venezuelaj arepoj kun la farĉaĵo ”Reina Pepiada”

Saluton amikoj! Por la unua fojo mi faris venezuelan manĝaĵon kaj vere mi tre ŝatis! Mi jam listigis kelkajn aliajn por ontaj fojoj! Arepo estas kiel speco de ronda maiza pano aŭ bulko kiu estas antaŭkolumba manĝaĵo ĉiutaga el Kolombio kaj Venezuelo.Tiu ĉi arepo venas de la pasinta jarcento kaj estas dediĉita al junulino kiu por la unua fojo iĝis Miss Universo reprezentante Venezuelon. Se vi ne havus teksturigitan sojon vi povus uzi fungojn anstataŭ ĝi, pro la teksturo viandeca. Tiu ĉi manĝaĵo estas sufiĉe facile farebla kaj tre bongusta sed kun multaj kalorioj, tiel do, estu prudenta 😉

Ingrediencoj por la arepoj:

  • 250 ml de akvo
  • 200 gr da maiz-faruno  
  • 1 kulereto da salo

Ingrediencoj por la farĉaĵo: 

  • 50 gr da teksturigita sojo (mezgranda peco)
  • 1/2 cepo
  • 1 kaj 1/2 avokado
  • 1 kaj 1/2 kulero da veganezo
  • Salo kaj pipro

Paŝoj:

  • Unue hidratigu la teksturigitan sojon kaj dum ĝi hidratiĝas tranĉu la cepon fajne kaj kuiru mezfajre kun iom da olivoleo. Aldonu la hidratigitan sojon (sen akvo) al la pato kun la cepo. Lasu ĝin kuiriĝi malrapide ĝis la sojo orkoloriĝu kaj konservu.
  • Dume, ni faru la arepojn. En ujo metu akvon, aldonu kulereton da salo kaj poste iom post iom la faruno ĝis akiro de nealgluiĝema pasto kaj leĝere malseka. Knedu kelkajn minutojn kaj poste faru el ĝi bulon kaj lasu ĝin ripozi.
  • Senŝeligu la avokadon kaj premu ĝin farante kremon per forko. La alian duonon (tiel aperas en la ingrediencoj!) tranĉu lamene kaj konservu. La kremigitan avokadon miksu al la sojviando kaj same aldonu la kuleron kaj duono da veganezo. Miksu bone kaj kontrolu ĉu ĝi bezonas salon aŭ ne.
  • La veganezon faru vi mem, ĝi estas vere simpla. Klaku ĉi tie por vidi bonan recepton kiun mi afiŝis antaŭlonge!
  • Nun preparu la arepojn: Dividu la paston je kvar partoj. Faru bulojn kaj premu ilin ĝis 1 cetrimetro dikaj proksimume. Poste metu ilin sur rostilo aŭ pato. Faru ilin kun tre malmulte da oleo, lasu ilin orkoloriĝi ambaŭflanke.
  • Por farĉi ilin, malfermu duone kaj en ĝia bazo aldonu la avokad-tranĉaĵojn kaj sur ĝi la farĉaĵon kaj jen ĉio!

Ĝuu kaj bonan apetiton!

Vegana paelo!

Saluton! Unu el miaj unuaj pubikaĵoj en VeganArto estis ĝuste paelo! Tiam mi volontulis en Tuluzo kaj mi regalis miajn ĉarmajn gastigantojn kuirante ĝin! Tamen, mi devas agnoski ke tio okazis antaŭ 4 jaroj, kiam mi ne bone scipovis kiel fari ĝin kaj krome mi ne povis trovi nek la paelon (pato) nek la ingrediencojn deziratajn por ĝin fari kaj kvankam la rezulto gusta ne malbonis, la foto estis vera hororaĵo. Tiel do, nun kiam preskaŭ ĉiutaga kuirado de paeloj estas mia rutinaĵo, mi decidis rekrei la recepton, fari novan foton kaj kundividi ree kun vi! Mi ŝategis la rezulton, simpligis ĝin por faciligi ĝin al miaj sekvantoj kaj dankas al vi ĉiuj! Faru ankaŭ vi paelon ĉe vi! Fine, la paelo estas legoma, tiel do, vi sentu vin libera aldoni pliajn legomojn aŭ fungojn, aliajn spicojn, alian rizon, kunkreu ankaŭ vi!

Ingrediencoj:

  • 400 gramoj da bul-rizo
  • 1 cepo
  • 2 ajleroj
  • 1/4 da ruĝa kapsiko
  • 1/4 verda kapsiko
  • 2 tomatoj aŭ 200 gr da tomatsaŭco
  • 1 karoto
  • manpleno da pizoj
  • Papriko
  • Nigra pipro
  • Peco da kukurbeto
  • Peco da melongeno
  • Kolorigaĵo
  • Olivoleo
  • Salo
  • Akvo

Paŝoj:

  • Tranĉu la legomojn. Por ŝpari tempon en la ellaborado de la paelo, unue tranĉu ĉion je etaj pecoj; tiamaniere, ĉiuj legomeroj same kuiriĝos kaj dum malpli da tempo.
  • Faru sofriton per la ingrediencoj: Metu la paelon  (t.e. la pato) surfajre, aldonu kelkajn kulerojn da olivoleo kaj unue aldonu la kapsikojn kaj la karoton ĉar ili bezonas iom pli da tempo. Poste ni aldonu la cepon kaj la ajlon. Movu ĉion dum unu minuto proksimume. Kiam ili estu orkoloraj, aldonu la ceterajn legomojn.
  • Aldonu la rizon al la paelo. Duonglaso da rizo sufiĉas por unu manĝanto, tiel do, vi facile povos kalkuli kiom da rizo vi bezonos! Fritu ĝin dum du minutoj movante ĝin senĉese kun la ceteraj ingrediencoj. Faru cirklajn movojn 🙂
  • Aldonu nun la tomaton kaj akvon ĝis ĝi kovru ĉion kaj eĉ iomete pli. Raspu la du tomatojn aŭ uzu tomatsaŭcon. Aldonu kaj movu.
  • Ĉi momente ankaŭ spicu kaj salu laŭplaĉe. Lasu ĝin kuiriĝi. Ĝi estos preta kiam la likvaĵo malaperu; tio ĉi okazas post 20 minutoj pli malpli. Dum la kuirado kontrolu la malmolecon de la rizo, se ĝi ankoraŭ malmolas, kuiri je malalta fajro. Kiam ĝi estos preta, forigu el la fajro, kovru per pura tuko kaj lasu ripozu dum 5-10 minutoj 😉 

(Ankaŭ eblas kuiri ĝin la lastajn kvin minutojn en la forno antaŭe varmigita. Tio estas, kiam en la paelo ankoraŭ restos iom da likvaĵo likvaĵo, forigu el la fajru kaj metu en la fornon je 250 gradoj dum kvin minutoj!) 

Latinamerika pladego!

Saluton amikoj! Ameriko estas vasta kaj longa kontinento kun diversaj kulturoj. Tamen, ni havas mutajn komunajn ingrediencojn kiuj kelkfoje igas nin kundividi tre similajn manĝaĵojn. En niaj teleroj oftas la rizoj, la terpomoj, maizo, fazeoloj, bananoj, ktp. Mi volis nomi la pladon kiun mi montras al vi kiel ”kuban pladegon” sed ĝi tre similas al kolombia kaj venezuela pladegoj. Tiel do, por trovi pli ĝustan kompromison mi nomas ĝin ”latinamerika”. Mi elektis tiujn manĝaĵojn por formi la pladegon sed vi povas aldoni pliajn (ekz. patakonoj, avokado, arepoj). Mi antaŭsciigas vin ke por fari ĝin mi bezonis entute du horojn ĉar samtempe mi faris plurajn manĝaĵojn sed la rezulto ja indas! Mi rekomendas unue tranĉi kaj prepari ĉiujn ingrediencojn kaj unue fari la fazeolojn kaj la maniokon. Ĉar ili postulas sufiĉe da tempo surfajre, dume vi povas prepari la haketitan viandon. Lasu por la fino la frititan bananon kaj la moho-saŭcon.

Nigraj fazeoloj:

dav

nigraj fazeoloj

400 gr da nigraj fazeoloj
2 litroj da akvo
100 ml da olivoleo
4 ajleroj
1 ruĝa kapsiko
duonkulereto da nigra pipro
duonkulereto da origano
duonkulereto da papriko
1 folio el nobla laŭro
koriantro
2 kuleroj da sukero
2 kuleroj da vingro
100 ml da blanka vino
salo.

Paŝoj: Unue lasu ripozi enakve la fazeolojn minimume 5 horojn aŭ prefrinde la antaŭan nokton. Post tiu tempo forigu la akvon kaj en kaserolo kun du litroj da akvo aldonu la nigrajn fazeolojn kun la duono de la ruĝa kapsiko fajne tranĉita, la nobla laŭr-folio, koriando, kumino, origano. Lasu ĝin kuiri mez-altfajre ĉ. 45 min.
Post tiu tempo faru sofriton kun ajlo kaj cepo fajne tranĉitaj, la alia duono de la ruĝa kapsiko, nigra pipro oleo kaj salo. Aldonu ĝin al la fazeoloj kaj lasu kuiri 30 min. pli je meza fajro. Post tiu tempo aldonu vinagron, vinon, sukeron, paprikon kaj lasu 15 minutojn pli. Fine aldonu du kulerojn da olivoleo kaj salo se necese!

Havan-stila haketita viando:

dav

ĵavanstila haketita viando ”pikadijo”

100 gr da fajna teksturigita sojo
1 cepo fajne tranĉita
1/2 ruĝa kapsiko
3 ajleroj
1 celeri-branĉeto
1 kulero da kaporoj
1/2 doso da tomatsaŭco
1/2 taso da olivoj
1/4 taso da sekvinberoj
Spicoj: kumino, origano, koriandro, petroselo
olivoleo
Salo kaj pipro laŭplaĉe

Paŝoj: Unue lasu la teksturigitan sojon almenaŭ dek minutojn en malvarma akvo.
Faru sofriton kun la cepo kaj la ajlo fajne tranĉitaj, la ruĝan kapsikon, la celerion kaj kaporojn. Lasu kuiri ĝin kelkajn minutojn movante. Poste aldonu la sojon kaj daŭre movu. Aldonu nun la spicojn, la tomatsaŭcon, olivojn, sekvinberojn kaj salon. Lasu kuiriĝu je malalta fajro dek minutojn.

Manioko kun moho:
(moho estas tipa aŭco kiun oni aldonas al la manioko boligita en Kubo)
1 kg da manioko
Akvo
Salo
Por la moho:
6 ajleroj
3 citronoj
1/2 taso da olivoleo
kulereto da kumino (grenoj)
2 kuleroj da petroselo fajne tranĉita
salo

Paŝoj: En kaserolo kun sifĉa kvanto da akvo lasu la senŝeligitan kaj rondtranĉitan maniokon boli kun salo. Por scii kiam ĝi pretos pero akra ilo kontrolu tion. Kiam ĝi estos sofiĉe mola, ĝi estos preta. Forigu la akvon kaj servu en ujo.
La saŭco simplas:
Varmigu la oleon kun ajleroj tranĉitaj kaj la kumino kaj salo. Kiam la ajleroj estu sufiĉe frititaj, aldonu zorgeme la citronsukon kaj movu ĉion. Sekve aldonu ĝin al la maniokoj.

Fritita banano:
Ŝmiru per tritikfaruno la bananon kaj fritu en varma oleo.

Rizo:
500 gr da rizoj
1,5 litroj da akvo
4 kuleroj da oleo
salo

Paŝoj: En kaserolo aldonu la oleon kaj la rizon kaj movu. Kiam ĝi estu sufiĉe varma kaj preskaŭ rostita, tuj aldonu la akvon, la salon kaj je alta fajro lasu ĝin boli. Kiam ĝi ekbolu, kaj sufiĉe da akvo evaporiĝu, lasu ĝin je malalta fajro kaj kovru la rizon per aluminia papero kaj lasu 10 minutojn pli.

Salato:
Laktuko
ruĝa cepo
tomato

Bolivia ternuksa supo

Saluton amikoj! Antaŭ kelkaj tagoj mi serĉis interrete latinamerikajn pladojn por fari hejme ĉar kutime mi ŝategas la vastan latinamerikan kuirarton! Kompreneble ne ekzistas unu latinamerika kuirarto sed ni ĉiuj havas multajn komunajn bazajn ingrediencojn kaj ja multaj pladoj, kelkfoje hispan-, azi- aŭ afrikdevenaj estas diversmaniere adaptitaj al niaj lokaj, regionaj kaj naciaj kuirartoj! Bolivio estas lando el kiu mi sciis nenion rilate manĝaĵojn sed ĝuste mi ekkonis ulo kiu eklaboris en la sama restoracio kie mi laboras. Li estas boliviano kaj menciis ĝin kaj mi tuj serĉis interrete la veganan version. Mi mem kreis mian propran veganigon kaj mi esperas ke vi ĝuos ĝin!

Ingrediencoj:

  • 1 taso (100 gr.) da ternuksoj krudaj kaj senŝelaj.
  • 1 mezgranda cepo fajne tranĉita.
  •  2 celeribranĉetoj tranĉitaj.
  • 2 karotoj en rondtranĉaĵoj.
  • 1 peco da brasiko tranĉita.
  • 1 terpomo senŝeligita kaj tranĉita kvadratete.
  • 1/2 taso da pizoj.
  • Spicoj: kumino, blanka pipro, papriko kaj origano.
  •  2 litroj da akvo kun kvadrateto da koncentrita legomsupo.
  • Sunfloroleo kaj salo laŭplaĉe.
  • 1/2 taso da vermiĉeloj aŭ alia malgranda pastaĵo.
  • 1 terpomo tranĉita Julienne-stile por friti kaj ornami la pladon.

Paŝoj:

  • En kaserolo ni aldonas iom da oleo kaj ni lasu friti la cepon kaj tuj poste aldonu la karoton, la celeribranĉetojn, la pizojn kaj la terpomojn. Movu ĉion bone. Spicu ĝin laŭ via plaĉo kun la supraj menciitaj spicoj.
  • Aldonu du litrojn da akvo kaj la koncentrita legomsupo. Lasu ĝin kuiriĝi dudek minutojn je meza faro
  • Dum la supo kuiriĝas ni kirlu la ternuksojn per miksaparato ĝis akiro de ternuksa lakto densa kaj konservu.
  • Pli malpli post tiuj 20 minutoj aldonu la kirlitan ternukson kaj la vermiĉelojn, movu bone kaj lasu ĝin pliajn 12 minutojn… Estu atentema ĉar la ternuksaĵo emas surbordigi la kaserolon samkiel lakto varmega.
  • Dume ni fritu la terpomojn en varma sunfloroleo. Servu la supon kun tranĉita petroselo kaj la frititaj terpomoj!
    Bonan apetiton!

“Fideuà”, valencia vermiĉelaĵo!

Saluton amikoj! Kiam mi loĝis en Kubo mi memoras ke pro kontakto kun Hispanio (mia onklino tiam loĝis Madride) mi eksciis ke ĝia kuirarto tro diversas kaj ke preskaŭ ĉiu aŭtonoma regiono havas sian ‘propran’ kuirarton. Tion mi ne multe komprenis ĉar en Kubo ni ĉiuj manĝis preskaŭ samajn manĝaĵojn. Poste mi komprenis ke lando kun malsama historia evoluo (malsamaj reĝlandoj, regantoj, religioj, geografio, ktp) havis tiom da diversaj pladoj!

Sendube unu el la aŭtonomaj regionoj kun bonegaj kaj famegaj pladoj kiaj paelo estas Valencio. Ĝi havas ankaŭ alian pladon sufiĉe konata en tuta Hispanio sed mi ne scias ĉu en aliaj landoj ankaŭ! Temas pri manĝaĵo tre simila al paelo, sed oni uzas vermiĉelojn anstataŭ rizo!

Mi uzis multajn legomojn ĉar mi havis ilin ĉemane sed vi mem povas uzi kiujn vi havas kaj ŝatas. Se vi ne havus sojon, mi same diras, simple ne uzu ĝin. Kaj fine, mi arde rekomendas uzi legomsupon ĉar ĝi donos bonegan guston al la vermiĉelaĵo!

Ingrediencoj: (por kvar homoj)

  • 1 ruĝa kapsiko
  • 1 verda kapsiko
  • 1 flava kapsiko
  • 100 gr da ĉampinjonoj
  • 1 cepo
  • 1 ajlero
  • 2 karotoj
  • 400 gr da tomatsaŭco
  • Melongeno
  • Kukurbeto
  • Teksturigita sojo (dika)
  • 500 gr da vermiĉeloj
  • Rosmareno
  • Timiano
  • Petroselo
  • Salo
  • Olivoleo
  • 750 L da legomsupo aŭ akvo.

Paŝoj:

IMG_20170914_015212_830

  • Unue ni devas rosti la vermiĉelojn! Ni devas ŝmiri paton per oleo kaj aldoni la vermiĉelojn kaj je mezalta fajro rosti ilin. Post kvin minutojn pli malpli ili estos pretaj. Sed ne lasu ilin solaj! Konstante zorgu pri ili kaj movu per spatelo. Konservu ĝin por posta uzo.
  • Dua paso estos la tranĉado de ĉiuj legomoj kaj enakvigado de la teksturigita sojo minimume 15 minutojn sub varm(et)a akvo kun iom da salo.
  • En la patego (granda pato) kie vi faros ĝin unue faru sofriton: Aldonu 3-4 kulerojn da olivoleo kaj sekve la tranĉitan cepon kaj ajleron kaj movu! Poste aldonu ĉion alian: kukuerto, melongeno, kapsikoj, karoto kaj movu bone. Spicu kaj salu.
  • Post kelkaj minutoj, aldonu la teksturigitan sojon kaj movu ĉion kaj sekve aldonu la tomatsaŭcon kaj se necese aldonu pli da spicoj kaj salo!
  • Kiam la legomoj estos sufiĉe kuiritaj, aldonu la rostitajn vermiĉelojn, la akvon aŭ legomsupon kaj je mezalta fajra lasu ĝin kuiri ĝis la akvo reduktiĝas.
  • Forigu ĝin el la fajro kaj per pura tuko kovru la pategon dek minutojn kaj fine servu!
  • Bonan apetiton!

Taja kareaĵo el tofuo kun zingibro kaj kokoslakto.

Saluton verduloj! Unu el miaj unuaj pladoj kiam mi iĝis vegano estas precize tiu ĉi! Mi ŝatis ĝin multe sed mi ne scias kial poste mi farias alitipajn pladojn kaj ne plu ĉi tiun. Ĉar mi iris al azia vendejo kaj aĉetis plurajn kilojn da tofuo mi iom pensis kion fari el ĝi kaj mi tuj memoris! La preparado estas vere simpla kaj rapida! Por plitajlandigi ĝin mi rekomendas manĝi kun basmati-rizo kies aromo estas unika! Jen la receptoj kaj simplaj paŝoj:

Ingrediencoj:

  • 500 gr da tofuo
  • 10 ĉampinjonoj
  • 1 cepo
  • 1 verda kapsiko
  • 1 doso da kokoslakto por kuiri.
  • Kareo
  • Zingibro
  • Olivoleo
  • Pipro
  • Salo

Paŝoj:

  • Unue preparu ĉion kion vi bezonos por la plado: tranĉu bone la cepon kaj la verdan kapsikon. Tranĉu la tofuon je grandetaj kvadratoj kaj lamenigu la ĉampinjonojn.
  • Aldonu la cepon kaj la kapsikon al pato kun 3-4 kuleroj da olivoleo kaj lasu friti ĝis la cepo ŝanĝas sian koloron. Aldonu la tofuon kaj la lamenigitajn ĉampinjonojn.
  • Movu ĉion bone kaj kiam la ĉampinjono ŝanĝu la koloron aldonu salon, pipron kaj kareon (unu supkulero). Movu denove kaj aldonu la kokoslakton.
  • Lasu ĝin kuiriĝi kvin minutojn kaj sekve alonu raspitan zingibron (unu kulero) kaj lasu minuton pli. Nia tofuaĵo tiam estos preta!

Bonan apetiton!