Burgero el kikeroj, aveno kaj kareo

Saluton amikoj! La mondo pri veganaj burgeroj estas senlima! Nur sufiĉas iom trarigardi vian manĝoŝrankon kaj tuj elpensi burgeron! Ni diru ke pli malpli tiel naskiĝis ĉi burgero. Nur 100 gramoj da kikeroj kuiritaj sen salo donas al ni karbonhidraton (kiu donas energion), dieta fibro (bona por la kora kaj digesta sano), proteinoj kaj grasoj, sed krome, ili donas al ni vitaminojn A, B6, C, E kaj K, kalcio, fosforo, kalio, zinko, magnezio, fero kaj natrio. Kaj la aveno estas alia bonega nutraĵo ĉar ĝi satigas, preventas kaj mildigas la mallakson, bona por homoj kun alta kolesterolo, preventadas la kanceron, favorigas la kreadon de nova histo kaj nia koro pli bone fartos!

Post tiuj sciencaj argumentoj por manĝi tiaspecan burgeron, kiu ja estas sana rapidmanĝaĵo, jen la recepto. Mi esperas ke vi ĝin ĝuos!

Ingrediencoj:

  • 400 gr da kuiritaj kikeroj
  • 100 gr da avenflokoj
  • 1/3 taso da faruno
  • 4 ajleroj tre fajne tranĉitaj aŭ kulereto da seka ajlo
  • 1 kulereto da kareo (pulvorigita)
  • 1 kulereto da kumino
  • 1/2 kulereto da nigra pipro
  • 1 kulereto da salo
  • 1/2 kulereto da natria bikarbonato
  • Olivoleo
  • Suko el unu citrono
  • Por la akompano: terpomoj, avokado, ruĝa cepo, eruko aŭ kio ajn plaĉu al vi!

Paŝoj:

  • Premu la kikerojn per premilo en ujo ampleksa.
  • Aldonu ĉiujn aliajn ingrediencojn kaj miksu bone farante samecan paston.
  • Dividu la paston farante bulojn, platigu ilin per via mano mem. Poste sur pato varma kaj kun iomete da oleo kuiru la burgerojn tri minutojn por ĉiu flanko 🙂

 

Pano por burgeroj

En la lastaj monatoj mi komencis esplori pri burgeroj. Mi ŝatas ilin ĉar oni povas krei multegajn malsamajn burgerojn el tre diversaj ingrediencoj troveblaj laŭ la sezono, regiono aŭ propra aparta ŝato. Burgeroj povas esti el fazeoloj, rizoj, sojo, aveno, pizoj kaj tre ofte miksitaj… Sed ĉiam mi havis la saman problemon: La pano. Neniu el la aĉeteblaj panoj en ĉiuj supermarktoj madridaj konvinkis min. Ĉu pro la formo, ĉu pro la gusto aŭ ĉu pro la troa aldono de ĥemiaĵoj. Tial mi esploris kaj trovis ĉi tiun panon por burgeroj sed ankaŭ por manĝi alimaniere! 

Tiun ĉi panon mi faris sufiĉe rapide sed mi devas konfesi ke mi iom pigris kaj ne volis knedi dum 10 minutoj senĉese . Tial do, mi lasis ĝin ripozi du horojn kaj bone funkciis! Nun vi ankaŭ povas fari viajn panojn!

Ingrediencoj:

  1. 500 gr da nerafinita faruno aŭ spelto.
  2. 325 ml da akvo
  3. 80 gr da olivoleo
  4. 1 kulero da sukero
  5. 10 gr da gisto
  6. 10 gr da salo
  7. Sezam- aŭ sunflorsemoj

Paŝoj:

  1. Miksi ĉiujn ingrediencojn en bovlo kaj formi la paston. 
  2. Sur tablo, knedu la paston ĝis ĝi estu glata (ĉ. 10 – 15 minutoj). Se vi ne emas knedi, kovru la paston per tuko kaj lasu ĝin ripozi du horojn.
  3. Elbovligu la paston kaj dispartigu ĝin en ok samajn pecojn.
  4. Faru bulojn per ĉiu peco de pasto.
  5. Sur fornoplato krovita de vegetaĵa fornpapero kaj ŝmirita de oleo, metu la dispecigitan paston lasante spacon inter ili. Milde premu la bulojn, per kuirpeniko akvumu ĝin kaj aldonu sezam-semojn. Mi ne havis sezamon, tial mi aldonis sunflor-semojn!
  6. Denove kovru ilin por plia duonhoro.
  7. Ĉi momente ŝaltu la fornon kaj lasu ĝin je 170 gradoj (338 gf). 
  8. Post duonhoro, metu ilin en la fornon ĝis ili estu orkoloraj. Miaj estis ene dum 45 minutoj proksimume.

Kaj la pano jam pretas!!! Ĝi estos utila por burgero kiun kie recepton mi baldaŭ publikigos!!!

Burgero el rizo, kikeroj kaj beto!

La farado de veganaj burgeroj estas vera arto kiu nur konas limon, via kreemo! El multaj vegetaĵoj eblas fari tre bongustajn burgerojn kun tre malsamaj gustoj! Tiu ĉi kiun mi prezentas al vi estas nutricie sufiĉe kompleta burgero ĉar ĝi kombinas guŝojn kun cerealo, kio donas bonkvalitajn proteinojn kaj beto kiu havas sufiĉe da akvo, fibro, mineraloj kaj vitaminoj.

Tiu ĉi recepto estas relative facila kaj farebla en multaj lokoj de la mondo pro la tutmondeco de ĝiaj ingrediencoj. Por fari ĝin ni bezonas:

Ingrediencoj:

  1. 400 gr da rizo 
  2. 500 gr da kikeroj
  3. 3 betoj
  4. Olivoleo
  5. Spicoj

Paŝoj:

Unue ni kuiru la rizon kun iomete pli da akvo ol kutime por ke ĝi iĝu pli glueca. Mi uzis endosigitajn kikerojn de supermakto sed se vi volas kuiri ilin, tio eĉ pli bone estus. Per forko tretu la kikerojn ĝis kreado de pasto. Poste kirlu la kuiritajn betojn kaj miksu ĉion kaj movu bone por ke ĉio iĝu sameca pasto.

Aldonu al la pasto la spicojn laŭplaĉe. Mia havas origanon, kuminon, Provenco-herbojn, kareaĵon, pulvorigitajn cepon kaj ajlon kaj petroselon. Movu ĝin denove. Konservu la paston dum 30 minutoj por ke ĝi iĝu pli konsista sed se vi volus tuj fari la burgerojn, aldonu iom da raspita pano.

Donu formon al viaj burgeroj permane aŭ per burgermuldilo kaj kuiru ĝin sur pato aŭ en la forno kaj manĝu ĝin kun bona salato!

 

Bonan apetiton!

 

Burgero el kvinoo!

Burgeroj el vegetaĵoj abundas kaj je gustoj kaj je koloroj sed tiu ĉi estas specialaĵo por multaj el la veganoj. Kvinoo estas relative nova nutraĵo en Eŭropo kaj Azio sed ĝi havas malnovan tradicion kaj uzadon en la andaj landoj, pli specife en Peruo kie la inkaoj konsumis ĝin pro la proteinoj kaj esencaj grasoj kiujn ĝi enhavas. La kvinoo aĉeteblas en multaj veganaj vendejoj, en pluraj grandaj kaj mezgrandaj supermarktoj, per interreto kaj en landoj kiaj Peruo ĉie! Se vi ofte aŭ de tempo al tempo havas ĝin kaj neniam provis fari burgerojn per ĝi, jen la momento por tion fari! 
Ingrediencoj:
  • 1 taso da kvinoo
  • ½ taso da ruĝa kapsiko fajne tranĉita
  • ½ da cepo fajne tranĉita
  • Spicoj laŭplaĉe (kumino, papriko, origano…)
  • ½ taso da raspita karoto (laŭplaĉe)
  • 3 plenaj kuleroj da kiker- aŭ tritikfaruno.
Preparado:
La unua paŝo estos la kuirado de la kvinoo. Por tio unue ni devas purigi ĝin per akvo frotante per niaj manoj sub malvarma akvo de la krano kaj forigi la ŝaŭmon kiun ĝi eligas. Poste ni metu la kvinoon en la kaserolon kaj aldonu du tasojn aŭ eĉ tri da akvo malvarma, iom da salo kaj oleo. Lasi ĝin boli dum 15 minutoj proksimume. Ni scias kiam ĝi estos jam preta ĉar la semoj pli kreskas kaj ‘rompiĝas’. Konservu ĝin sen la akvo.
Je meza fajro ni fritu la cepon kaj kapsikon kun la raspita karoto kaj post tri minutoj ni aldonu la spicojn. La celo estas krei sofriton al kiu ni aldonos la kvinoon kaj iom poste ankaŭ la farunon. Post iom da agitado ni sentos kiel kreiĝas pli densa kaj sameca pasto. Ni forigu ĝin el la fajro. 
Nun ni povas doni butgeran formon al la pasto. Mi kutime uzas muldilon sed per niaj manoj mem ni tion povas fari! Lasu ilin malvarmiĝi por ke la burgeroj estu pli malmolaj kaj ne rompiĝu!
Mi rekomendas manĝi ĝin en la burgera pano kun laktuko, tomato kaj avokado! La rezulto estas nekredeble bongustega!