Pastaĵo kun kukurbeto

Saluton! Pastaĵojn oni povas manĝi plej diverse kaj kun multaj ingrediencoj laŭ sezone kaj kompreneble, laŭplaĉe. Ĉi tiu plado, pastaĵo kun kukurbetoestas vere facile farebla, nutriga kaj milde gusta. Se vi ŝatas pastaĵojn, jen recepto por vi!

Ingrediencoj:

  • 320 gr da mallongaj pastaĵoj (ekz fusilioj aŭ ‘papilioj’)
  • 650 gr da kukurbeto raspita.
  • Bazilio laŭplaĉe.
  • Salo laŭplaĉe.
  • 20 ml da olivoleo.
  • Nigra pipro laŭplaĉe.
  • 1 ajlero.

Paŝoj:

  • Unue bolu akvon en granda poto kaj tuj post ekbolo aldonu salon.
  • Dume lavu, sekigu kaj raspu la kukurbeton kun la ŝelo.
  • Verŝu la oleon sur grandan paton kaj varmigu je malalta fajro kun ajlero.
  • Aldonu la  kukurbetaĵon, salon kaj pipron kaj kuiru dum 5-6 minutoj, foje kirlante ĝin; poste forigu la ajleron.
  • Dume kuiru la pastaĵon en la bolanta akvo kun salo kaj kiam ĝi estos preta filtru, sed konservu glason da tia akvo. Por scii kiam pretos la pastaĵo, legu la kuirpaŝojn ĉe la kovraĵo.
  • Verŝu la pastaĵon en la paton kun la kukurbeto raspita, kun iom da konservita akvo, plu kuiru ĝin altfajre dum kelkaj minutoj kaj poste malŝaltu. Parfumu ĝin kun bazilio kaj la pastaĵo estos preta!

Bonan apetiton! 

Minestrono, bunta itala supo

Minestronon mi manĝadas tre ofte! Jes, tio okazas kiam la koramiko estas italo! Ĝi iĝis tradicio por ĉemontaraj ekskursaj vespermanĝoj aŭ dum tagoj frostaj aŭ kiam la gorĝo doloras. Ĉiam oni trovas bonajn kialojn por minestronoj! Temas pri supo tre varia, sen fiksa recepto, ĉar tradicie oni faras ĝin laŭ la sezonaj legomoj kaj laŭ la ebloj de la kuirantoj. Tial, kelkaj minestronoj havas multajn legomojn, dum aliaj estas pli modestaj. Mi lasas sube la recepton de la lasta minestrono kiun mi manĝis sed vi povas modifi ĝin laŭ viaj ŝatoj kaj ebloj!

Ingrediencoj:

  • 1 cepo
  • 4 ajleroj
  • 3 celeri-tigoj
  • 2 tomatoj
  • 1 kukurbeto
  • 1 manpleno da vermiĉeloj
  • 3 supkuleroj da olivoleo
  • 1 litro da akvo
  • 5 terpomoj
  • brokolo
  • spicoj laŭplaĉe (origano ekz)

Paŝoj:

  • Unue lavu ĉiujn legomojn kaj fajne tranĉu ilin. La terpomojn tranĉu en kubojn, same la tomatojn.
  • Due varmigu poton, verŝu la oleon kaj poste aldonu la ajlerojn kaj fritu. Poste aldonu la cepon kaj kirlu ĝis ĝi estu mola kaj travidebla.
  • Sekve aldonu ĉiujn legomojn en la poton, kirlu dum kelkaj minutoj kaj poste verŝu la akvon. Kirlu, salu, spicu laŭplaĉe kaj lasu ĝin boli kaj poste je mez-malalta fajro dum 30 minutoj proksimume.
  • Kiam mankos ĉirkaŭ 3 minutoj aldonu la vermiĉelojn kaj denove kirlu.
  • Servu kaj ĝuu ĝin!

 

Bonan apetiton!