Vegana paelo!

Saluton! Unu el miaj unuaj pubikaĵoj en VeganArto estis ĝuste paelo! Tiam mi volontulis en Tuluzo kaj mi regalis miajn ĉarmajn gastigantojn kuirante ĝin! Tamen, mi devas agnoski ke tio okazis antaŭ 4 jaroj, kiam mi ne bone scipovis kiel fari ĝin kaj krome mi ne povis trovi nek la paelon (pato) nek la ingrediencojn deziratajn por ĝin fari kaj kvankam la rezulto gusta ne malbonis, la foto estis vera hororaĵo. Tiel do, nun kiam preskaŭ ĉiutaga kuirado de paeloj estas mia rutinaĵo, mi decidis rekrei la recepton, fari novan foton kaj kundividi ree kun vi! Mi ŝategis la rezulton, simpligis ĝin por faciligi ĝin al miaj sekvantoj kaj dankas al vi ĉiuj! Faru ankaŭ vi paelon ĉe vi! Fine, la paelo estas legoma, tiel do, vi sentu vin libera aldoni pliajn legomojn aŭ fungojn, aliajn spicojn, alian rizon, kunkreu ankaŭ vi!

Ingrediencoj:

  • 400 gramoj da bul-rizo
  • 1 cepo
  • 2 ajleroj
  • 1/4 da ruĝa kapsiko
  • 1/4 verda kapsiko
  • 2 tomatoj aŭ 200 gr da tomatsaŭco
  • 1 karoto
  • manpleno da pizoj
  • Papriko
  • Nigra pipro
  • Peco da kukurbeto
  • Peco da melongeno
  • Kolorigaĵo
  • Olivoleo
  • Salo
  • Akvo

Paŝoj:

  • Tranĉu la legomojn. Por ŝpari tempon en la ellaborado de la paelo, unue tranĉu ĉion je etaj pecoj; tiamaniere, ĉiuj legomeroj same kuiriĝos kaj dum malpli da tempo.
  • Faru sofriton per la ingrediencoj: Metu la paelon  (t.e. la pato) surfajre, aldonu kelkajn kulerojn da olivoleo kaj unue aldonu la kapsikojn kaj la karoton ĉar ili bezonas iom pli da tempo. Poste ni aldonu la cepon kaj la ajlon. Movu ĉion dum unu minuto proksimume. Kiam ili estu orkoloraj, aldonu la ceterajn legomojn.
  • Aldonu la rizon al la paelo. Duonglaso da rizo sufiĉas por unu manĝanto, tiel do, vi facile povos kalkuli kiom da rizo vi bezonos! Fritu ĝin dum du minutoj movante ĝin senĉese kun la ceteraj ingrediencoj. Faru cirklajn movojn 🙂
  • Aldonu nun la tomaton kaj akvon ĝis ĝi kovru ĉion kaj eĉ iomete pli. Raspu la du tomatojn aŭ uzu tomatsaŭcon. Aldonu kaj movu.
  • Ĉi momente ankaŭ spicu kaj salu laŭplaĉe. Lasu ĝin kuiriĝi. Ĝi estos preta kiam la likvaĵo malaperu; tio ĉi okazas post 20 minutoj pli malpli. Dum la kuirado kontrolu la malmolecon de la rizo, se ĝi ankoraŭ malmolas, kuiri je malalta fajro. Kiam ĝi estos preta, forigu el la fajro, kovru per pura tuko kaj lasu ripozu dum 5-10 minutoj 😉 

(Ankaŭ eblas kuiri ĝin la lastajn kvin minutojn en la forno antaŭe varmigita. Tio estas, kiam en la paelo ankoraŭ restos iom da likvaĵo likvaĵo, forigu el la fajru kaj metu en la fornon je 250 gradoj dum kvin minutoj!) 

Silko, la silenta ekspluatado.

Kio estas silko?

La silko estas natura fibro formita el proteinoj. Per ĝi oni faras teksaĵojn (silkaĵojn).

Por ekhavi ĉi tiun silkon, la fabrikantoj mortigas milojn da milionoj da vermoj ĉiujare per vaporo aŭ gasoj.

La alternativoj al la silko inkluzivas nilonon, poliesteron kaj filamentojn de la kapokarbo.

La silko estas la fibro kiun la silkovermoj teksas por fari siajn kokonojn. La silko venas el la larvokokonoj kaj pro tio plejmulto el la insektoj breditaj por la industrio ne vivas longe kaj estas murditaj per gasumado ene de la kokonoj.

Oni bezonas ĉirkaŭ 3.000 vermojn por ĉiu funto da silko. La vermoj konstante travivas streĉiĝon kaj longan suferadon ĝis ili estas muelitaj por akiri la lastan produkton. Tial ni rekomendas ĉiam bone revizii la kravatojn, vestojn kaj teksaĵojn dum viaj butikumadoj kaj trovu veganan alternativon. Elektu la vivon ne nur de pli belaj kaj amikemaj bestoj kiaj la hundoj aŭ katoj. Ĉiuj vivuloj meritas vivi kaj ni povas helpi per la uzado de vegetaĵaj alternativoj ne nur manĝaj sed ankaŭ vestaj!

Pano por burgeroj

En la lastaj monatoj mi komencis esplori pri burgeroj. Mi ŝatas ilin ĉar oni povas krei multegajn malsamajn burgerojn el tre diversaj ingrediencoj troveblaj laŭ la sezono, regiono aŭ propra aparta ŝato. Burgeroj povas esti el fazeoloj, rizoj, sojo, aveno, pizoj kaj tre ofte miksitaj… Sed ĉiam mi havis la saman problemon: La pano. Neniu el la aĉeteblaj panoj en ĉiuj supermarktoj madridaj konvinkis min. Ĉu pro la formo, ĉu pro la gusto aŭ ĉu pro la troa aldono de ĥemiaĵoj. Tial mi esploris kaj trovis ĉi tiun panon por burgeroj sed ankaŭ por manĝi alimaniere! 

Tiun ĉi panon mi faris sufiĉe rapide sed mi devas konfesi ke mi iom pigris kaj ne volis knedi dum 10 minutoj senĉese . Tial do, mi lasis ĝin ripozi du horojn kaj bone funkciis! Nun vi ankaŭ povas fari viajn panojn!

Ingrediencoj:

  1. 500 gr da nerafinita faruno aŭ spelto.
  2. 325 ml da akvo
  3. 80 gr da olivoleo
  4. 1 kulero da sukero
  5. 10 gr da gisto
  6. 10 gr da salo
  7. Sezam- aŭ sunflorsemoj

Paŝoj:

  1. Miksi ĉiujn ingrediencojn en bovlo kaj formi la paston. 
  2. Sur tablo, knedu la paston ĝis ĝi estu glata (ĉ. 10 – 15 minutoj). Se vi ne emas knedi, kovru la paston per tuko kaj lasu ĝin ripozi du horojn.
  3. Elbovligu la paston kaj dispartigu ĝin en ok samajn pecojn.
  4. Faru bulojn per ĉiu peco de pasto.
  5. Sur fornoplato krovita de vegetaĵa fornpapero kaj ŝmirita de oleo, metu la dispecigitan paston lasante spacon inter ili. Milde premu la bulojn, per kuirpeniko akvumu ĝin kaj aldonu sezam-semojn. Mi ne havis sezamon, tial mi aldonis sunflor-semojn!
  6. Denove kovru ilin por plia duonhoro.
  7. Ĉi momente ŝaltu la fornon kaj lasu ĝin je 170 gradoj (338 gf). 
  8. Post duonhoro, metu ilin en la fornon ĝis ili estu orkoloraj. Miaj estis ene dum 45 minutoj proksimume.

Kaj la pano jam pretas!!! Ĝi estos utila por burgero kiun kie recepton mi baldaŭ publikigos!!!

Fanzeranto, revueto kultura en esperanto

Saluton karaj legantoj! Ĉu vi scias kio estas Fanzeranto? Temas pri eta revuo eldonita pdf-formate en Brazilo kun la celo diskonigi kulturaĵojn en esperanto, rapide kaj etkoste. Ĝia unua numero aperis en 2010 kaj ĝia lasta apero iĝis la deka! Ekde la septembra numero aperis en ĝi sekcio pri veganaj receptoj de VeganArto. Sed ĉi foje por proksimigi la legantaron kun veganismo ne nur aperis recepto sed ankaŭ artikolo “Ĉu vi estas vegano?” kiu per facila lingvaĵo mi provis klarigi kio ĝi estas kaj kial indas esti vegano. Mi rekomendas ĝin por legado ĉar ĝia aspekto estas alloga, okulplaĉa kaj moderna. Diskonigu ĝin ankaŭ por motivigi ĝian kreinton pludaŭrigi ĝin!

Klaku ĉi tie por vidi ĉiujn numerojn de Fanzeranto!

Veganaj meksikaj faĥitoj

Unu el la plej popularaj pladoj de la riĉa meksika kuirarto estas la tiej nomataj ”faĥitoj”  (hispane ‘fajita’ povas signifi etaj strio, zono aŭ bendo). Por ĝi ni bezonos simplajn ingrediencojn kaj meksikan tortiljojn kiujn ofte oni povas trovi en supermarktoj. Se vi ne trovus la tortiljojn ĉe vi, eblas simple anstataŭi ilin per la folioj de laktuko. Tiu ĉi recepto ne estas komplika, ĝi estas tre bunta pro la diversaj koloroj de la ingrdiencoj kaj vere bongusta kaj leĝera! Per la sekvaj kvantoj mi faris entute ses faĥitojn. Mi ĉi tie nur volas montri kiel fari ilin ĝenerale  ĉar vi mem povas aldoni aŭ forigi ingrediencojn laŭ viaj ebloj kaj ŝatoj. Faru viajn proprajn faĥitojn por familia aŭ amika manĝo kaj se vi manĝemas kiel mi, faru ilin por vi mem!!!

Ingrediencoj:

  1. 1 ruĝa kapsiko
  2. 1 verda kapsiko
  3. 1 cepo
  4. 1 ajlero
  5. 1 taso da kuiritaj fazeoloj
  6. 1 kukurbeto
  7. 1 karoto (lamenigita)
  8. Sojsaŭco
  9. Origano
  10. Kumino
  11. Petroselo (sekigita aŭ natura)
  12. Taso da kuiritaj fazeoloj

Gvakamolo:

Gvakamolo aŭ avokada kaĉo estas por ŝmiri ĝin sur la tortiljo. Ĝi donas specialan guston kaj ĝia farado tre simplas. Vi nur bezonas unu avokadon, citronsukon kaj duoncepon. Per kulero elprenu la manĝeblan parton de la avokado kaj per forkon kremigu ĝin, aldonu la cepon fajne tranĉita kaj la citronsukon. Lasu ĝin en la fridujo dum la faĥitoj prepariĝas.

Paŝoj:

Sur pato aŭ fritilo sufiĉe ampleksa kaj kun altetaj bordoj aldonu tri aŭ kvar kulerojn da olivoleo. Kiam ĝi estu varma aldonu la cepon kaj sekve la kapsikojn kaj la kukurbeton. Lasu ĝin je malalta fajro kun ŝtopilo por ke la legomoj estu kuirataj..

Movu ĝin de tempo al tempo kaj spicu per kumino, petroselo kaj origano laŭplaĉe. Aldonu la fazeolojn, la karoton kaj iom da sojsaŭco laŭplaĉe. Denove movu kaj lasu kvin minutojn surfajre, nun kun pli forta intenso.

La tortiljojn oni devas varmigi kelkajn sekundojn. Ŝmiru ĝin per la gvakamolo kaj en la mezo de la tortiljo aldonu parton de la kuiraĵo, se vi havas piksaŭcon aldonu kaj jam pretas por manĝado!

Strogonofo el terpomo, kukurbeto kaj ĉampinjono.

Strogonofo aŭ stroganofo estas rusa plado de la 19a jarcento, onidire, ĝin kreis ĉefkuiristo kiu laboris por la rusa militisto, duko Pavel Aleksandroviĉ Stroganov. Ĝi ekiĝis kadre de kuirkonkurso en Peterburgo. De tie ĝi disvastiĝis en Ĉinion, Usonon kaj Brazilon inter aliaj landoj! Kutime ĝi estas manĝata kun spagetoj aŭ rizo. Sed oni povas manĝi ĝin kun kio ajn oni deziru 🙂

La manĝaĵo tradicia enhavis viandopecojn de bovino, cepo, ĉampinjonoj kaj acidkremo. Poste la recepto suferis plurajn ŝanĝojn en pluraj landoj sed restis la ideo. Mi volas prezenti al vi tre facilan recepton kaj same bongustegan!

Por fari ĝin vi povas uzi haketitan viandon el sojo sed se vi ne havas ĝin, simple kun legomoj kaj ĉampinjonoj sufiĉas. Mi iom hezitis ne aldoni la sojviandon sed fine tre kontentis pri la rezulto! Ankaŭ mi mem faris la kremon el aveno, ĝi postulas nur avenflokojn kaj akvon!

Ingrediencoj:

  • 1 Kukurbeto (se ĝi grandas, nur la duono sufiĉos)
  • 1 mezgranda terpomo
  • 150 gramoj da ĉampinjonoj
  • 1 cepo
  • 2 ajleroj
  • 4 kuleroj da oleo
  • 4 kuleroj da mustardo
  • Duontaso da tomatsaŭco
  • Spicoj (laŭplaĉe)
  • Salo

Por la kremo:

  • 250 gramoj da avenflokoj kaj la duoblo da akvo.
  • Lasu ilin ripozi en la miksaparato dum 30 minutoj.
  • Post tio, kirlu kaj filtru ĝin kaj la kremo estas farita.

Preparmaniero:

  • 1- Senŝeligu la kukurbeton kaj la terpomon kaj faru malgrandetajn pecojn, kun kvadrateca formo estus pli bone. Same tranĉu la cepon sed ne kvadrate. Tranĉu ĝin pli longe kaj fajne! Laŭ la juliana tranĉostilo. Tranĉu lamene la ĉampinjonojn (ankaŭ eblas aĉeti ilin jam lamenigitaj)
  • 2- Aldonu iom da oleo en kuirpoto kaj aldonu la cepon kaj lasu ĝin friti kaj sekve aldonu la ajlerojn kaj la distranĉitan terpomon. Movu ĝin kaj post kelkaj sekundoj aldonu la kukurbopecojn, salon kaj spicojn laŭplaĉe kaj sekve aldonu la ĉampinjonjn.
  • 3- Aldonu nun la avenkremon kaj la tomatsaŭcon kaj la mustardon kaj bone kirlu ĝin por ke ĝi iĝu sameca.
  • 4- Kun tre malalta faro, aldonu al la kremo tomatsaŭcon kaj mustardon kaj ade kirlu ĝin de tempo al tempo ĝis kuiriĝo de la terpomoj kaj kukurbetoj!
  • 5- Servu ĝin prefere kun rizo aŭ spagetoj! Kaj ek! bonan apetiton!